சி.பி.ராதாகிருஷ்ணனுக்காக கட்சி மாறி வாக்களித்த எதிர்க்கட்சி எம்.பி.க்கள்!

குடியரசு துணைத் தலைவர் தேர்தல்

- நமது சிறப்பு நிருபர்

நமது சிறப்பு நிருபர் புது தில்லி, செப். 9: நாட்டின் இரண்டாவது மிக உயர்ந்த அரசியல் அமைப்பு பதவிக்கான தேர்தலில் எதிர்பார்த்ததை விட அதிகமான வாக்குகளை தேசிய ஜனநாயக கூட்டணி வேட்பாளர் சி.பி. ராதாகிருஷ்ணன் பெற்று இந்தியாவின் குடியரசு துணைத்தலைவர் பதவிக்குத் தேர்வாகியுள்ளார்.

இதையொட்டி, செவ்வாய்க்கிழமை நடந்து முடிந்த தேர்தலில் மொத்தம் பதிவான 767 வாக்குகளில் 300 ‘முதல் விருப்ப வாக்குகள்’ எதிர்க்கட்சி வேட்பாளரான உச்ச நீதிமன்ற முன்னாள் நீதிபதி பி. சுதர்சன் ரெட்டிக்கு கிடைத்தது. சி.பி. ராதாகிருஷ்ணன் 452 முதல் விருப்ப வாக்குகளை பெற்றதாக தேர்தல் நடத்தும் அலுவலரான மாநிலங்களவை செயலாளர் ஜெனரல் பி.சி. மோடி அறிவித்தார். இந்த தேர்தலில் பெரும்பான்மை பலம் பெற தேவையான இடங்கள் 377. அந்த வகையில் பெரும்பான்மைக்கும் கூடுதலாகவே சி.பி. ராதாகிருஷ்ணன் வாக்குகளைப் பெற்றார்.