பிகாரில் வரைவு வாக்காளர் பட்டியல் வெளியிடத் தடையில்லை: உச்சநீதிமன்றம்

ஆதார், வாக்காளர் அட்டையை ஏற்க மீண்டும் அறிவுரை

- 

புது தில்லி, ஜூலை 28: பிகாரில் தேர்தல் ஆணையம் மேற்கொண்டுவரும் வாக்காளர் பட்டியல் சிறப்பு தீவிர திருத்தப் பணிக்கு எதிரான மனுக்கள் மீதான விசாரணை நிலுவையில் உள்ள நிலையில், அந்த சிறப்பு தீவிர திருத்தத்தின் அடிப்படையில் தேர்தல் ஆணையம் வரைவு வாக்காளர் பட்டியலை வெளியிடத் தடை இல்லை என்று உச்சநீதிமன்றம் திங்கள்கிழமை தெரிவித்தது.

அதே நேரம், 'தேர்தல் ஆணையத்தின் சிறப்பு தீவிர திருத்தத்துக்கு எதிரான மனுக்கள் அனைத்துக்கும் ஒரே நேரத்தில் தீர்வு அளிக்கப்படும்' என்று குறிப்பிட்ட உச்சநீதிமன்றம், 'வாக்காளர் பட்டியல் சிறப்பு தீவிர திருத்தப் பணியில் வாக்காளர்களின் குடியுரிமை ஆவணங்களாக ஆதார், வாக்காளர் அடையாள அட்டையை ஏற்க வேண்டும்' என்று தேர்தல் ஆணையத்தை உச்சநீதிமன்றம் மீண்டும் கேட்டுக்கொண்டது.

பிகாரில் நிகழாண்டு இறுதியில் சட்டப்பேரவைத் தேர்தல் நடைபெற உள்ள நிலையில், மாநில வாக்காளர் பட்டியலை சிறப்பு தீவிர திருத்தம் செய்யும் பணியை தேர்தல் ஆணையம் மேற்கொண்டு வருகிறது. அதன்படி, மாநிலத்தில் 2003-ஆம் ஆண்டுக்குப் பின்னர், வாக்காளராகப் பதிவு செய்துகொண்டவர்கள், தாங்கள் இந்தியர்கள் என்பதை நிரூபிக்க பிறப்புச் சான்றிதழ், கடவுச்சீட்டு (பாஸ்போர்ட்) நகல் போன்ற கூடுதல் ஆவணங்களைச் சமர்ப்பிக்க வேண்டும்.