கோயில்களில் கும்பாபிஷேக விழா

திருவானைக்காவல் மேலக்கொண்டையம்பேட்டை பகுதியில் உள்ள ஸ்ரீ அங்காள பரமேஸ்வரி கோயில் மகா கும்பாபிஷேகம் ஞாயிற்றுக்கிழமை நடைபெற்றது.

- 

ஸ்ரீரங்கம், லால்குடி, துறையூர், தொட்டியம், மே 4:

மேலக்கொண்டையம்பேட்டை பகுதியில் அமைந்துள்ள ஸ்ரீ அங்காள பரமேஸ்வரி, ஸ்ரீவிநாயகர், ஸ்ரீபேச்சியம்மன், ஸ்ரீ அகோரவீரபத்திரர், ஸ்ரீசங்கிலி ஆண்டவர், ஸ்ரீமதுரைவீரன் ஆகிய கோயில்களுக்கு மிதுன லக்னத்தில் மகா கும்பாபிஷேகம் ஞாயிற்றுக்கிழமை காலை நடைபெற்றது.

முன்னதாக, வெள்ளிக்கிழமை காலை காவிரி அம்மாமண்டபம் படித்துறையிலிருந்து மங்களவாத்தியத்துடன் ஒட்டகம், ஜல்லிக்கட்டு காளை, கிடா ஆடு, நாட்டிய குதிரை ஆகியவற்றுடன் வாணவேடிக்கை முழங்க ஊர்வலமாக தீர்த்தக்குடங்கள் கோயிலுக்கு எடுத்து வரப்பட்டன. தொடர்ந்து, யாகசாலை பூஜைகள் தொடங்கியது.

சனிக்கிழமை காலை இரண்டாம் கால பூஜையும், மாலை மூன்றாம் கால பூஜையும் நடைபெற்றன. இதைத் தொடர்ந்து, ஞாயிற்றுக்கிழமை காலை கோ-பூஜையுடன் வேத பாராயணம் முழங்க மங்களவாத்தியத்துடன் யாகசாலையிலிருந்து தீர்த்தக்குடங்கள் கோபுர கலசங்களுக்கு எடுத்து வரப்பட்டு காலை 10 மணிக்கு அனைத்து கோபுர கலச விமானங்களுக்கும் மகா கும்பாபிஷேகம் நடைபெற்றது. இதில், ஏராளமான பக்தர்கள் கலந்து கொண்டு தரிசனம் செய்தனர். விழா ஏற்பாடுகளை கோயில் திருப்பணிக் குழுவினர் செய்திருந்தனர்.

சந்திரமௌலீஸ்வரர் கோயில் கும்பாபிஷேக விழா