பிரான்ஸ்: தேர்தலில் போட்டியிட தீவிர வலதுசாரி தலைவருக்குத் தடை

நிதி முறைகேடு வழக்கில் குற்றவாளியாக அறிவிக்கப்பட்டதால், பிரான்ஸின் தீவிர வலதுசாரி கட்சியான தேசியவாத பேரணி கட்சியின் முக்கிய தலைவர் மரீன் லெப்பென் தேர்தல்களில் போட்டியிடுவதற்குத் தடை விதிக்கப்பட்டுள்ளது.

- 

பாரிஸ், மார்ச் 31:

உடனடியாக அமலுக்கு வரும் இந்தத் தடையால் அடுத்த அதிபர் தேர்தலில் வெற்றி பெற்று நாட்டின் தலைமைப் பொறுப்பை ஏற்பதற்கான வாய்ப்பு மரீனிடமிருந்து முழுமையாகப் பறிக்கப்பட்டுள்ளது. மேலும், பிரான்ஸ் அரசியலில் இந்தத் தீர்ப்பு மிகப் பெரிய அதிர்வலையை ஏற்படுத்தும் என்று கூறப்படுகிறது.

ஐரோப்பிய நாடாளுமன்ற உதவியாளர்களின் ஊதியத்துக்காக அந்த நாடாளுமன்றத்தால் வழங்கப்படும் நிதியை முறைகேடாக கட்சிக்காரர்களின் கணக்குகளில் பல ஆண்டுகளாக மாற்றிவந்ததாக மரீன் லெப்பென் மற்றும் 24 கட்சி உறுப்பினர்கள் மீது குற்றஞ்சாட்டப்பட்டு வழக்கு நடைபெற்றுவந்தது.

இந்த வழக்கின் தீர்ப்பை நீதிபதிகள் குழு திங்கள்கிழமை வெளியிட்டது. அதில், மரீன் மீது சுமத்தப்பட்டுள்ள குற்றச்சாட்டுகள் உறுதி செய்யப்படுவதாகவும், இதன் காரணமாக அவர் தேர்தலில் போட்டியிடுவதற்குத் தடை விதிக்கப்படுவதாகவும் நீதிபதிகள் கூறினர்.

இதைக் கேட்டதும் மரீன் லெப்பென் தீர்ப்பு முழுவதும் வாசிக்கப்படுவதற்கு முன்னரே நீதிமன்றத்தைவிட்டு வெளியேறினார்.

பின்னர் தீர்ப்பை தொடர்ந்து வாசித்த நீதிபதிகள், தேர்தலில் போட்டியிடுவதற்கான தடை உடனடியாக அமலுக்கு வருவதாகவும் அடுத்த ஐந்து ஆண்டுகளுக்கு இந்தத் தடை அமலில் இருக்கும் என்றும் கூறினர்.