மாநகராட்சி ‘பட்ஜெட்’ பற்றாக்குறையை சரிசெய்ய நடவடிக்கை

மேயர் மு. அன்பழகன்

- 

திருச்சி, மார்ச் 29: திருச்சி மாநகராட்சி பட்ஜெட் பற்றாக்குறையை சரி செய்ய நடவடிக்கை எடுக்கப்படும் என மேயர் மு. அன்பழகன் தெரிவித்தார்.

திருச்சி மாநகராட்சியின் பட்ஜெட் விவாத கூட்டம் மாநகராட்சி மைய வளாகத்தில் வெள்ளிக்கிழமை நடைபெற்றது. கூட்டத்துக்கு மேயர் மு. அன்பழகன் தலைமை வகித்தார். ஆணையர் வே. சரவணன், துணை மேயர் ஜி. திவ்யா ஆகியோர் முன்னிலை வகித்தனர். நகரப் பொறியாளர் சிவபாதம், மண்டலக் குழுத் தலைவர்கள், மாமன்ற உறுப்பினர்கள் கலந்து கொண்டனர்.

கூட்டத்தில் மாநகராட்சியின் பல்வேறு திட்டங்களை பாராட்டிய மாமன்ற உறுப்பினர்கள் தொடர்ந்து பேசியதாவது:

சுரேஷ் (சிபிஐ): மாநகராட்சி பள்ளிகளில் மழலையர் வகுப்புகளை விரிவுப்படுத்த வேண்டும்.

பைஸ் அகமது (மமக): அண்ணாமலை நகர் உக்கிரமாகாளியம்மன் கோயிலுக்கு பின்புறம் உள்ள பகுதிகளில் மழைநீர் வடியாமல் தேங்கி பொதுமக்களுக்கு பாதிப்பு ஏற்படுவதைத் தடுக்க புதிய திட்டத்தை செயல்படுத்த வேண்டும்.

சங்கர் (திமுக): வருவாயைப் பெருக்க மாநகராட்சி கட்டடத்தில் வாடகை வசூலை அதிகப்படுத்த வேண்டும்.

ராமதாஸ் (திமுக): மாநகரில் மழைநீர் தேங்காமல் தடுக்க திட்டம் தேவை.