வட்டி விகிதம் தொடர்ந்து மூன்றாவது முறையாக குறைப்பு

5.5 சதவீதமாக நிர்ணயித்தது ஆர்பிஐ

- 

மும்பை, ஜூன் 6: வங்கிகளுக்கான வட்டி விகிதத்தை (ரெப்போ ரேட்) இந்திய ரிசர்வ் வங்கி (ஆர்பிஐ) 0.50 சதவீதம் குறைத்து 5.5 சதவீதமாக நிர்ணயித்துள்ளது. இதனால், வீடு, வாகனம், தனிநபர் கடன் உள்ளிட்ட பல்வேறு கடன்களுக்கான வட்டி விகிதம் மேலும் குறைய வாய்ப்பு ஏற்பட்டுள்ளது.

அதே நேரத்தில் வங்கிகளில் நிரந்தர வைப்பு, தொடர் வைப்பு உள்ளிட்ட சேமிப்புத் திட்டங்களுக்கு வங்கிகள் அளிக்கும் வட்டி குறைக்கப்படும் சூழல் உருவாகியுள்ளது. ஏற்கெனவே தொடர்ந்து இரண்டு முறை வட்டி விகிதம் 0.25 சதவீதம் குறைக்கப்பட்ட நிலையில், இப்போது மூன்றாவது முறையாக 0.50 சதவீதம் குறைக்கப்பட்டுள்ளது.

ஆர்பிஐ-யின் வட்டி விகித குறைப்பு, நாட்டின் பொருளாதாரத்துக்கு ஊக்கமளிக்கும் நடவடிக்கையாகக் கருதப்படுகிறது. இது தொழில் துறையினர், வர்த்தகர்கள், நுகர்வோருக்கும் சாதகமானதாகும். பல்வேறு தரப்பினரும் இதை வரவேற்றுள்ளனர். கட்டுமானத் துறை, வாகன விற்பனை, உற்பத்தி உள்ளிட்ட பல்வேறு பணப்புழக்கம் அதிகரிக்கும். இது நாட்டில் பொருளாதாரச் செயல்பாடுகளை அதிகரிக்கும்.