கரோனாவுக்குப் பிறகு 4 மடங்கு அதிகரித்த இதய நாள தளர்ச்சி!

தமிழக மருத்துவர்கள் ஆய்வில் தகவல்

- ஆ. கோபிகிருஷ்ணா

கரோனா பெருந்தொற்றுக்குப் பிறகு இதய நாள தளர்ச்சி பாதிப்புக்குள்ளாவோரின் (கரோனரி ஆர்ட்டரி எக்டேசியாஸ்) எண்ணிக்கை நான்கு மடங்கு உயர்ந்திருப்பது தமிழக அரசு மருத்துவர்களின் ஆய்வில் தெரியவந்துள்ளது.

அதிலும், குறிப்பாக இணை நோய்கள் ஏதுமில்லாத இளம் வயதினருக்கு அத்தகைய பாதிப்பு இரு மடங்கு அதிகரித்துள்ளது கண்டறிப்பட்டுள்ளது. கரோனா தொற்றால் ரத்த நாள செல்களில் ஏற்படும் அழற்சி இதற்கு காரணமாக இருக்கலாம் என மருத்துவர்கள் தெரிவிக்கின்றனர்.

சென்னை ஓமந்தூரார் அரசு பல்நோக்கு மருத்துவமனையின் இதயவியல் துறைத் தலைவரும், பேராசிரியருமான டாக்டர் ஜெ. செசிலி மேரி மெஜல்லா மற்றும் இதயவியல் மருத்துவர் ஏ. ஆன்டினா ஆகியோர் இணைந்து இந்த ஆய்வை முன்னெடுத்தனர். அதன்படி, ஏறத்தாழ 7 ஆண்டு கால தரவுகளையும், ஆஞ்சியோ பரிசோதனை முடிவுகளையும் ஒப்பீடு செய்தனர். அதாவது, கரோனாவுக்கு முந்தைய காலகட்டமான 2017 முதல் 2019 வரை 8,300 பேரின் மருத்துவத் தரவுகள் எடுக்கப்பட்டன. அதைத் தொடர்ந்து, 2020 முதல் 2023 வரையில் 11,420 பேரின் தரவுகள் சேகரிக்கப்பட்டன.

அவ்வாறாக மொத்தம் 19,720 பேரின் இதய நலன் சார்ந்த முக்கிய மருத்துவ விவரங்களை அவர்கள் ஆய்வு செய்தனர். அதன் அடிப்படையில், சில உண்மைகளைக் கண்டறிந்துள்ளனர்.