'மக்களைத் தேடி மருத்துவம்' திட்டம்: நகர்ப்புறங்களில் சிக்கல்

'மக்களைத் தேடி மருத்துவம்' திட்டத்துக்கு நகர்ப்புற மக்கள் போதிய ஒத்துழைப்பு தராததால், அந்தத் திட்டத்தை பெரு நகரங்களில் செயல்படுத்துவதில் தொடர்ந்து சிக்கல் நீடித்து வருகிறது.

- 

குடியிருப்பு பகுதிகளுக்குள் நுழைவதற்கே சுகாதாரப் பணியாளர்களுக்கு அனுமதி மறுக்கப்படுவதால், குடியிருப்போர் நலச் சங்கங்கள், தன்னார்வலர்களின் உதவியை நாட வேண்டிய நிலைக்கு பொது சுகாதாரத் துறை தள்ளப்பட்டிருக்கிறது. குறிப்பாக, அடுக்குமாடி குடியிருப்புகள், அனைத்து வசதிகளையும் உள்ளடக்கிய பாதுகாப்பு நிறைந்த குடியிருப்புகளில் வசிக்கும் மக்களின் மருத்துவத் தரவுகளைத் திரட்டுவதில் பெரும் சவாலை எதிர்கொள்வதாக சுகாதாரத் துறையினர் தெரிவிக்கின்றனர்.

தமிழகத்தில் மக்களைத்தேடி மருத்துவம் திட்டம் முதல்வர் மு.க.ஸ்டாலினால் கடந்த 2021 ஆகஸ்ட் மாதம் 5-ஆம் தேதி தொடங்கி வைக்கப்பட்டது. இத்திட்டத்தில், பயனாளிகளின் இல்லங்களுக்குச் சென்று முக்கியமான மருத்துவ சேவைகள் வழங்கப்படுகின்றன.