சிறந்த உயர் கல்வி நிறுவனங்கள்: தமிழகம் முதலிடம்

7-ஆவது ஆண்டாக சென்னை ஐஐடி சாதனை

- 

புது தில்லி, செப். 4: தேசிய அளவிலான சிறந்த உயர் கல்வி நிறுவனங்களின் ஒட்டுமொத்த தரவரிசையில் தமிழகம் முதலிடம் பிடித்துள்ளது.

முதல் 100 இடங்களில் அதிக (17) உயர் கல்வி நிறுவனங்கள் இடம்பெற்ற மாநிலம் என்கிற பெருமை தமிழகத்துக்கு கிடைத்துள்ளது. இதற்கு அடுத்தபடியாக 11 உயர் கல்வி நிறுவனங்களுடன் மகாராஷ்டிரம் இரண்டாம் இடத்திலும், 9 உயர் கல்வி நிறுவனங்களுடன் உத்தர பிரதேச மாநிலம் மூன்றாம் இடத்திலும் உள்ளன.

தேசிய அளவிலான சிறந்த உயர் கல்வி நிறுவனங்கள் தரவரிசையில் ஏழாவது ஆண்டாக சென்னை ஐஐடி முதலிடம் பிடித்து அசத்தியுள்ளது. பெங்களூரு இந்திய அறிவியல் கழகம் (ஐஐஎஸ்சி) இரண்டாம் இடமும், தில்லி ஐஐடி மூன்றாம் இடமும் பிடித்துள்ளன.

நாட்டிலுள்ள உயர் நிறுவனங்களுக்கிடையே ஆரோக்கியமான போட்டியை உருவாக்கும் வகையில் சிறந்த உயர் கல்வி நிறுவனங்களுக்கான தேசிய அளவிலான உயர் கல்வி நிறுவனங்கள் தரவரிசைப்பட்டியலை (என்ஐஆர்எஃப்) மத்திய கல்வி அமைச்சகம் வெளியிட்டு வருகிறது. 2025-ஆம் ஆண்டுக்கான 10-ஆவது தரவரிசை வியாழக்கிழமை வெளியிடப்பட்டது.