தமிழக மீனவர்கள் விடுதலை, படகுகள் ஒப்படைப்பு

இலங்கை சிறை பிடித்துள்ள தமிழக மீனவர்களை விடுவித்து, அவர்களின் படகுகளைத் திரும்ப ஒப்படைக்க வேண்டும் என்று இலங்கை அதிபர் அநுர குமார திசாநாயகவிடம் பிரதமர் நரேந்திர மோடி நேரடியாக வலியுறுத்தினார்.

- கி.வைத்தியநாதன்

கி.வைத்தியநாதன் கொழும்பு, ஏப். 5:

முதல் நல்லெண்ண நடவடிக்கையாக, இலங்கை சிறைபிடித்துள்ள 11 தமிழக மீனவர்களை விடுவிக்க அந்நாட்டு அரசு முடிவு செய்துள்ள நிலையில், வரும் நாள்களில் மேலும் சிலர் விடுவிக்கப்படுவார்கள் என்று நம்புவதாக கொழும்பில் செய்தியாளர்களிடம் பேசிய இந்திய வெளியுறவுத் துறைச் செயலர் விக்ரம் மிஸ்ரி தெரிவித்தார்.

மூன்று நாள்கள் அரசுமுறைப் பயணமாக இலங்கைக்கு வெள்ளிக்கிழமை இரவு வந்த பிரதமர் மோடியை கொழும்பு சர்வதேச விமான நிலையத்தில் இலங்கை வெளி விவகாரங்கள் துறை அமைச்சர் விஜித ஹேரத் தலைமையில் ஆறு அமைச்சர்கள் வரவேற்றனர்.

கொழும்பு சுதந்திர சதுக்கத்தில் சனிக்கிழமை காலை பிரதமர் மோடிக்கு சம்பிரதாய முறைப்படி ராணுவ அணிவகுப்பு மரியாதை வழங்கப்பட்டது. 2024, செப்டம்பரில் அதிபராக திசாநாயக பதவி ஏற்ற பிறகு, இலங்கைக்கு அரசு முறை பயணம் மேற்கொள்ளும் முதலாவது வெளிநாட்டுத் தலைவர் மோடி ஆவார்.

அதிபருடன் சந்திப்பு: அதிபரின் செயலகத்தில் இரு நாட்டுத் தலைவர்களின் சந்திப்பு மற்றும் பேச்சுவார்த்தை சுமார் 30 நிமிஷங்கள் நடைபெற்றது. இலங்கை தரப்பில் பிரதமர் ஹரிணி அமரசூரிய, வெளியுறவு அமைச்சர் விஜித ஹேரத், பொருளாதார அபிவிருத்தி அமைச்சர் அனில் ஜெயந்த, அதிபரின் செயலர் நந்திகா சரத் குமணாயகே, இலங்கை மத்திய வங்கி ஆளுநர் நந்தலால் வீரசிங்க மற்றும் அதிகாரிகள் உடனிருந்தனர்.