ஒசாகாவை சந்திக்கும் அனிசிமோவா

ஹார்டு கோர்ட் கிராண்ட்ஸ்லாம் போட்டிகளில் ஒன்றான யுஎஸ் ஓபன் டென்னிஸின் அரையிறுதிச்சுற்றில், ஜப்பானின் நவோமி ஒசாகா - அமெரிக்காவின் அமாண்டா அனிசிமோவா மோதுகின்றனர்.

- 

நியூயார்க், செப்.4:

மகளிர் ஒற்றையர் காலிறுதிச்சுற்றில், 4 முறை கிராண்ட்ஸ்லாம் வென்றவரான ஜப்பானின் நவோமி ஒசாகா, 6-4, 7-6(7/3) என்ற நேர் செட்களில், போட்டித்தரவரிசையில் 11-ஆம் இடத்திலிருந்த செக் குடியரசின் கரோலின் முசோவாவை தோற்கடித்தார். இருவரும் சந்தித்தது இது 5-ஆவது முறையாக இருக்க, ஒசாகா 3-ஆவது வெற்றியைப் பதிவு செய்துள்ளார்.

இதையடுத்து, யுஎஸ் ஓபனில் 3-ஆவது முறையாகவும், அனைத்து கிராண்ட்ஸ்லாம் போட்டிகளிலுமாக 5-ஆவது முறையாகவும் அவர் அரையிறுதிக்கு வந்திருக்கிறார்.

இதுவரை கிராண்ட்ஸ்லாம் போட்டிகளில் தாம் களம் கண்ட 5 காலிறுதிச்சுற்றுகளிலுமே ஒசாகா வென்றிருக்கிறார். ஓபன் எராவில் இத்தகைய வெற்றியை பதிவு செய்த 3-ஆவது வீராங்கனை அவர். அமெரிக்காவின் கிறிஸ் எவர்ட், பெலரஸின் அரினா சபலென்கா ஆகியோர் முதலிருவர்.