தமிழகம் புதிய உச்சங்களை அடையும்: முதல்வர் மு.க.ஸ்டாலின்

இதுவரை அடையாத புதிய உச்சங்களை தமிழகம் அடையும் என தமிழக முதல்வர் மு.க.ஸ்டாலின் குறிப்பிட்டார்.

- 

திருப்பூர், ஆக. 11:

திருப்பூர் மாவட்டம், உடுமலை நேதாஜி மைதானத்தில் திங்கள்கிழமை நடைபெற்ற அரசு நலத்திட்ட உதவிகள் வழங்கும் விழாவில் ரூ.1,426.89 கோடி மதிப்பீட்டிலான 61 முடிவுற்ற பணிகளைத் திறந்து வைத்து, 35 புதிய திட்டப் பணிகளுக்கு அடிக்கல் நாட்டி, 19,785 பயனாளிகளுக்கு நலத்திட்ட உதவிகளை வழங்கி முதல்வர் மு.க.ஸ்டாலின் பேசியதாவது:

மறைந்த முன்னாள் முதல்வர் கருணாநிதியால் உருவாக்கப்பட்ட திருப்பூர் மாவட்டத்தில் கடந்த 4 ஆண்டுகளில் திமுக ஆட்சியில் பல்வேறு நலத்திட்டங்கள் மேற்கொள்ளப்பட்டுள்ளன.

அவற்றில் ரூ.58 கோடி மதிப்பீட்டில் 6,266 சாலைப் பணிகள், 133 கோயில்களுக்கு குடமுழுக்கு, 328 கோயில்களில் 804 சீரமைப்புப் பணிகள், 5 சிறிய அளவிலான ஜவுளிப் பூங்காக்கள் என ரூ.10,491 கோடி மதிப்பிலான வளர்ச்சிப் பணிகள், நலத் திட்ட உதவிகள் திருப்பூர் மாவட்டத்துக்குச் செய்யப்பட்டுள்ளன.

இவ்வளவு சாதனைகளையும் கடந்த 4 ஆண்டுகளில் திருப்பூருக்காகச் செய்திருக்கிறோம். ஆனால், அதிமுக ஆட்சியில் திருப்பூரின் வளர்ச்சிக்காகக் குறிப்பிட்டுச் சொல்லும்படியாக எதையும் செய்யவில்லை.