சிறுநீரக விற்பனை மோசடி குறித்து விசாரிக்க ஐ.ஜி. தலைமையில் சிறப்பு குழு

சிறுநீரக விற்பனை மோசடி குறித்து விசாரிக்க தென் மண்டல காவல் துறைத் தலைவர் (ஐ.ஜி.) பிரேமானந்த் சின்ஹா தலைமையில் சிறப்பு குழுவை அமைத்து, சென்னை உயர்நீதிமன்ற மதுரை அமர்வு திங்கள்கிழமை உத்தரவிட்டது.

- 

மதுரை, ஆக. 25:

பரமக்குடியைச் சேர்ந்த சத்தீஸ்வரன் சென்னை உயர்நீதிமன்ற மதுரை அமர்வில் தாக்கல் செய்த மனு: நாமக்கல் மாவட்டத்தில் நிகழ்ந்த சட்டவிரோத சிறுநீரக விற்பனை மோசடியை மிகவும் ஆபத்தான, தீவிரமான பிரச்னையாக கருத வேண்டியுள்ளது.

பள்ளிப்பாளையத்தில் உள்ள விசைத்தறித் தொழிலாளர்கள், சாய ஆலைகளில் பணியாற்றும் ஏழைத் தொழிலாளர்கள் சிலரின் தூண்டுதலால் சிறுநீரக தானம் செய்பவர்களாக மாறியுள்ளனர் என்பது மிகவும் வேதனைக்குரியது. இதில் முகவர்கள், மருத்துவர்கள், மருத்துவமனை அதிகாரிகளும் சம்பந்தப்பட்டிருக்கின்றனர். பாதிக்கப்பட்டவர்களின் வறுமையைப் பயன்படுத்தி, ரூ. 5 லட்சம் முதல் ரூ. 10 லட்சம் வரை வழங்கி அவர்களை சிறுநீரக தானம் செய்ய இடைத்தரகர்கள் கட்டாயப்படுத்தியிருப்பது தெரியவந்தது.

இது 1994-ஆம் ஆண்டைய மனித உறுப்புகள், திசுக்கள் மாற்று அறுவைச் சிகிச்சை சட்டத்தை மீறும் செயலாகும்.

இந்தச் சட்டத்தின் கீழ், மனித உறுப்புகளின் வணிக ரீதியான பரிவர்த்தனைக்குத் தண்டனை வழங்க வழிவகை செய்யப்பட்டுள்ளது.

இந்த சிறுநீரக விற்பனையில் பெரம்பலூர், திருச்சி தனியார் மருத்துவமனைகள் ஈடுபட்டது தெரியவந்தது. இவற்றில் பெரம்பலூர் மருத்துவமனை மண்ணச்சநல்லூர் பகுதியைச் சேர்ந்த திமுக நிர்வாகியின் குடும்பத்தினரால் நிர்வகிக்கப்படுவதாகத் தகவல்கள் வெளியாகின.

எனவே, இதுதொடர்பாக நியாயமான விசாரணையை உறுதி செய்வதற்காக சிபிஐ விசாரணைக்கு உத்தரவிட வேண்டும் என அவர் கோரினார்.