ஜாதிய வலையில் பிகார் அரசியல்!

வம்பர் மாதம் சட்டப்பேரவைத் தேர்தலுக்கு ஆயத்தமாகி வருகிறது பிகார் மாநிலம். எதிர்பார்ப்புகள் மற்றும் ஓயாத சிக்கல்கள் என இம்முறையும் இங்கு தேர்தலுக்கு ஐந்து மாதங்களுக்கு முன்பே பதற்றம் பரவிக் கிடப்பதை தில்லித் தலைவர்களின் இடைவிடாத தேர்தல் முன்னோட்ட பொதுக்கூட்ட பங்கேற்புகளால் அறிய முடிகிறது.

- ம.ஆ. பரணிதரன்

13.07 கோடி மக்கள்தொகை மற்றும் ஜாதி அடிப்படையிலான அரசியல் வரலாற்றைக் கொண்ட பிகார், தேசிய மற்றும் மாநில கட்சிகளுக்கு ஒரு முக்கியமான போர்க்களமாகத் திகழ்கிறது. நிதீஷ் குமாரின் ஐக்கிய ஜனதா தளம் (ஜேடியு) மற்றும் பாஜக தலைமையிலான ஆளும் தேசிய ஜனநாயகக் கூட்டணி (என்டிஏ) ஒருபுறமும் ராஷ்ட்ரீய ஜனதா தளம் (ஆர்ஜேடி) தலைமையிலான 'மகாகட்பந்தன்' மறுபுறமும் களத்தில் வியூகங்களை வகுத்து வருகின்றன.

பல மாநிலங்களில் பல்வேறு கட்சிகளின் வெற்றிக்கு வியூகம் வகுத்த பிரசாந்த் கிஷோர், சொந்த மண்ணில் சொந்தக் கட்சி கண்டு பல முறை தோற்றாலும் துவளாதவராக இங்கு தேர்தல் களத்தில் 'ஜன் சுராஜ்' கட்சியின் முகமாகக் களமிறங்குகிறார்.

அழுத்தத்தில் என்டிஏ: 2024 மக்களவைத் தேர்தலுக்கு முன்னதாக என்டிஏ அணிக்கு நிதீஷ் குமார் மீண்டும் திரும்பிய பிறகு இக்கூட்டணியின் செயல்திறன் பிகாரில் வலுப்பெற்றது. பிகாரில் மொத்தமுள்ள 40 மக்களவைத் தொகுதிகளில் 30 இடங்களை என்டிஏ வென்றது. தில்லி, ஹரியாணா, மகாராஷ்டிரத்தில் அடைந்த வெற்றிகளால் உற்சாகமடைந்துள்ள பாஜக, தனது இருப்பை பிகாரிலும் நிலைநிறுத்த பிரதமர் நரேந்திர மோடியின் செல்வாக்கை பயன்படுத்தத் திட்டமிட்டுள்ளது. குறிப்பாக, நிதீஷ் குமாரின் மதச்சார்பற்ற வாக்காளர் தளத்தை ஜேடியு துணையுடன் மிகவும் பிற்படுத்தப்பட்ட வகுப்பினர் மற்றும் மகா தலித்துக்களை அந்நியப்படுத்தாமல், தனது ஹிந்துத்துவ நிரலை முன்னிலைப்படுத்துவது பாஜகவின் திட்டமாகும். ஆனால், இது எந்த அளவுக்கு சாத்தியம் என்பது கேள்விக்குறி என்கின்றனர் அரசியல் ஆய்வாளர்கள்.