வாக்குரிமை பறிப்பை முறியடிப்போம்

தென்காசி, அக். 29: தேர்தல் ஆணையம் மூலம் வாக்காளர் பட்டியல் சிறப்பு தீவிர திருத்தம் என்கிற பெயரில் நம்முடைய வாக்குரிமையைப் பறிக்கும் பாஜகவின் முயற்சியை முறியடிப்போம் என்றார் முதல்வர் மு.க. ஸ்டாலின்.

- 

தென்காசியில் புதன்கிழமை நடைபெற்ற அரசு விழாவில், ரூ. 1,020 கோடி மதிப்பிலான 117 முடிவுற்ற பணிகளைத் தொடங்கி வைத்து, 83 புதிய திட்டப் பணிகளுக்கு அடிக்கல் நாட்டி, 2,44,669 பயனாளிகளுக்கு ரூ. 587 கோடியே 39 லட்சம் மதிப்பிலான நலத்திட்ட உதவிகளை வழங்கி முதல்வர் மு.க. ஸ்டாலின் பேசியதுாவது: என்ன தொல்லை கொடுத்தாலும் தமிழகத்தின் வளர்ச்சியை யாராலும் தடுக்க முடியவில்லை.

இப்போது தேர்தல் ஆணையம் மூலமாக, வாக்காளர் பட்டியல் சிறப்பு தீவிர திருத்தம் என்கிற பெயரில் நம்முடைய வாக்குரிமையைப் பறிக்க முயற்சிக்கிறது மத்திய அரசு. ஏற்கெனவே, பிகாரில் இதனால் என்ன நடந்தது என்று நாம் பார்த்தோம். பாஜக தோல்வி உறுதியானதால், வாக்காளர்களையே நீக்கத் துணிந்தார்கள்.

அதே நடைமுறையை தமிழகத்திலும் செய்ய இப்போது முயற்சிக்கின்றனர். தொடக்கம் முதலே இந்தச் சதியை உணர்ந்து அதை எதிர்த்துக் கொண்டிருக்கிறோம்.

இதற்கு கேரளமும் நம்முடன் இணைந்துள்ளது.