கரூரில் விஜய் பிரசாரத்தில் கூட்ட நெரிசல் குழந்தைகள் உள்பட 39 பேர் உயிரிழப்பு

கரூரில் சனிக்கிழமை நடைபெற்ற தவெக தலைவர் விஜய் பிரசாரத்தின்போது கூட்ட நெரிசலில் சிக்கி 10 குழந்தைகள், 18 பெண்கள் உள்பட 39 பேர் உயிரிழந்தனர்.

- 

கரூர் வேலாயுதம்பாளையத்தில் நடைபெற்ற பிரசாரத்தில் தலைவர்கள் விஜய் பேசியபோது திரண்டிருந்த கூட்டம்.

மேலும் 82 பேர் காயமடைந்தனர். இதில் 20-க்கும் மேற்பட்டோர் நிலை கவலைக்கிடமாக உள்ளது. எனவே, உயிரிழப்புகள் அதிகரிக்கக்கூடும் என அஞ்சப்படுகிறது.

தமிழக வெற்றிக் கழகத் தலைவர் விஜய், மூன்றாவது கட்டமாக நாமக்கல், கரூரில் பிரசார பயணம் மேற்கொண்டார். நாமக்கல் நிகழ்வை முடித்துக் கொண்டு கரூருக்கு சனிக்கிழமை மாலை வந்தபோது அவரைக் காண ஆயிரக்கணக்கான மக்கள் கூடியிருந்தனர்.

பிரசாரம் நடைபெற்ற வேலுச்சாமிபுரத்தில் விஜய் இரவு 7 மணிக்கு பேசத் தொடங்கினார். அப்போது, விஜய்யை காண முண்டியடித்தபடி கூட்டம் தொடர்ந்து அதிகரித்ததால், தொண்டர்களிடையே தள்ளுமுள்ளு ஏற்பட்டது. இதனால் அப்பகுதியில் கடும் நெரிசல் ஏற்பட்டது. சிறுவர், சிறுமிகள், இளம் பெண்கள் பலரும் கூட்ட நெரிசலில் சிக்கினர். அவர்கள் மீது பலரும் சாய்ந்து விழுந்ததால், ஒவ்வொருவராக மயங்கி விழத் தொடங்கினர். விஜய் பேசிக் கொண்டிருந்தபோதே பலரும் மயங்கினர்.

அப்போது கூட்டத்திலிருந்த சில பெண்கள் தங்களது குழந்தைகள் மயங்கிவிட்டதாக கூக்குரல் எழுப்பத் தொடங்கினர். இருப்பினும், விஜய் தொடர்ந்து பேசிக் கொண்டிருந்ததாலும், தொண்டர்கள் கத்தியபடியே இருந்ததாலும் உடனடியாக மயங்கியவர்களுக்கு உதவ எவராலும் முடியவில்லை.

தங்களது கால்களுக்கு இடையே மயங்கிக் கிடந்தவர்களை அருகிலிருந்தோர் மீட்டு பக்கத்திலிருந்த வீடுகளில் இருந்து தண்ணீர் பெற்று முதலுதவி அளித்தனர். இருப்பினும் சிறார்கள், இளம் பெண்கள் பலர் மயங்கிய நிலையிலேயே கிடந்தனர். அவர்களை போலீஸாரும், தவெக தொண்டர்களும் ஆம்புலன்ஸ் வாகனங்களுக்கு தூக்கிச் சென்றனர்.

கூட்டத்தை கலைக்க போலீஸார் லேசாக தடியடி நடத்தினர். பின்னர், மயக்கமடைந்தவர்களை மீட்டு ஆம்புலன்ஸ் வாகனங்களில் மருத்துவமனைக்கு அனுப்பி வைத்தனர்.

கலவர பூமியானது: முதலில், பிரசார இடத்துக்கு அருகே வேலுச்சாமிபுரம், வையாபுரி, ஐந்து ரோடு உள்ளிட்ட இடங்களில் இருந்த 6 தனியார் மருத்துவமனைகளுக்கு கொண்டு சென்றனர். பின்னர், கரூர் அரசு மருத்துவமனைக்கும் கொண்டுசெல்லப்பட்டனர்.