அன்புள்ள ஆசிரியருக்கு...

சமுதாயத்தின் ஆணிவேர்பெண் கல்வி என்பது சமுதாய பொது நலம் பெருக உன்னத வழி யாகும் ('பெண் கல்வி: நாட்டின் முதலீடு!'-துணைக் கட்டுரை-வழக்குரைஞர் சங்கீதா, 18.09.25). மகாகவி பாரதியார் பெண் கல்வியின் அவசியத்தை, அடிமைத்தனத்தின் அவலத்தை, நாட்டு மக்களுக்கு எடுத்துரைத்தார். பெரியார் ஈ.வெ. ரா. பெண் கல்வியின் அவசியத்தை சென்ற இடமெல்லாம் பதிவு செய்தார். பெண் என்பவள் வீட்டுக்குள் அடைந்து கிடக்கும் பொருள் அல்ல; அவள் சமுதாயத்தின் ஆணிவேர். மனித குலம் தேர் என்றால், அது சாயாமல் காக்கும் அச்சாணி போன்ற அமைப்பு கொண்டவள் பெண். பெண்ணின் பெருமை பேச எத்தனையோ பேர் இருக்கலாம். ஆனால், அவர்கள் முன்னேற அவர்களுக்கு கல்வி எனும் கண்ணைத் திறக்க எல்லோரும் முன்வர வேண்டும். ப. நரசிம்மன், தருமபுரி.

- 

வேடிக்கை பார்க்கும் உலகம்

காஸாவின் மீது இஸ்ரேல் வரம்பற்ற தாக்குதல் நடத்தி வருகிறது ('இப்படியே தொடர்ந்தால் எப்படி?' -ஆசிரியர் உரை, 19.09.25). பிஞ்சுக் குழந்தைகள் உணவுக்காக கையேந்தும் இந்த அவலத்தைப் பார்க்கும் போது நமக்கு கண்ணீர் கசிகிறது. நெஞ்சில் உரமுமின்றி நேர்மைத் திறமுமின்றி இஸ்ரேல் பிரதமர் நெதன்யாகு செய்யும் வஞ்சகத்தை உலகம் இன்னமும் வேடிக்கை பார்ப்பது அதிகபட்ச அநியாயம். ஐ.நா. அமைப்புகளின் அறிக்கைகள் மீதான நம்பிக்கை மடிந்து நீண்ட நாள்கள் ஆகிவிட்டன. அமெரிக்காவின் தயவில்தான் ஐ.நா. சபை இயங்குகிறதோ என்று எண்ணத் தோன்றுகிறது. வார்த்தை ஜாலங்களைத் தவிர்த்து உண்மை உயிர்வாழ உலகம் உருப்படியாய் ஏதாவது செய்தாக வேண்டும். அதையும் தாமதமின்றி செய்ய வேண்டும். அப்போதாவது தீர்வு கிடைக்குமா? மோ. சேவியர், வள்ளியூர்.