எஸ்.ஐ. பணியிடம்: பதவி உயர்வு, நேரடி நியமனத்துக்கு இனி பொதுவான தேர்வு

தமிழக அரசு உத்தரவு

- 

காவல் உதவி ஆய்வாளர் காலிப் பணியிடங்களை நிரப்ப பின்பற்றப்படும் பதவி உயர்வு, நேரடி நியமனம் போன்ற நடைமுறைகளுக்கு இனி பொதுவான தேர்வு முறை பின்பற்றப்படும் என தமிழக அரசு உத்தரவிட்டுள்ளது.

இதற்கான உத்தரவை உள்துறை கூடுதல் தலைமைச் செயலர் தீரஜ்குமார் வெளியிட்டுள்ளார். உத்தரவு விவரம்: காவல் துறையில் தலைமைக் காவலர்கள், காவலர்களின் திறன்கள் மற்றும் கல்வித் தகுதியை ஊக்குவிக்கும் வகையில், அவர்களுக்கு பதவி உயர்வு அளிக்கப்படுகிறது.

அதாவது, உதவி ஆய்வாளர் காலிப் பணியிடங்களில் 20 சதவீத இடங்கள் காவலர்கள், தலைமைக் காவலர்களின் பணி மூப்பு அடிப்படையிலும், தேர்வு முறைகள் வழியாகவும் தனியாக நிரப்பப்படுகின்றன.

மீதமுள்ள 80 சதவீத இடங்கள் தமிழ்நாடு சீருடைப் பணியாளர் தேர்வு வாரியம் மூலமாக நேரடி நியமனம் வழியே மேற்கொள்ளப்படுகிறது.

இந்நிலையில், இருதரப்பினருக்கும் அதாவது, நேரடியாக நியமனம் செய்யப்படும் 80 சதவீத தேர்வர்களுக்கும், பதவி உயர்வு மூலமாக உதவி ஆய்வாளர்களாக வரக்கூடியவர்களுக்கும் பொதுவான ஒரே தேர்வை மாநில அரசு நடத்த வேண்டுமென, வழக்கு ஒன்றில் உச்சநீதிமன்றம் உத்தரவிட்டது.