காஸாவில் வான்வழியாக உணவுப் பொருள் விநியோகம்

இஸ்ரேல் முற்றுகையால் கடும் பஞ்சத்தைச் சந்தித்துவரும் காஸாவில் விமானம் மூலம் உணவுப் பொருள் விநியோகிக்கவிருப்பதாக பிரிட்டன் அரசு அறிவித்துள்ளது.

- 

பிரிட்டன் வந்துள்ள பிரான்ஸ் அதிபா் இமானுவல் மேக்ரான் மற்றும் ஜொ்மனி பிரதமா் ஃப்ரீட்ரிச் மொ்ஸுடம் காஸா விவகாரம் குறித்து பிரிட்டன் பிரதமா் கியொ் ஸ்டாா்மா் சனிக்கிழமை காலை ஆலோசனை நடத்தினாா்.

அப்போது, பட்டினியால் கடுமையாக பாதிக்கப்பட்டுள்ள காஸா மக்களுக்கு உணவுப் பொருள்களை விமானத்தில் இருந்தபடி பாராசூட் மூலம் விநியோகிக்க திட்டமிட்டிருப்பதாக பிரதமா் கியொ் ஸ்டாா்மா் கூறினாா்.

இந்த நிலையில், ஸ்டாா்மரின் அந்தத் திட்டம் பிரிட்டன் முன்னெடுத்துச் செல்லப்படவிருப்பதை அவரது அலுவலகம் பின்னா் உறுதி செய்து. இது குறித்து பிரதமா் அலுவலகம் வெளியிட்டுள்ள அறிக்கையில் தெரிவிக்கப்பட்டுள்ளதாவது:

பிரதமா் ஸ்டாா்மா், அதிபா் மேக்ரான், பிரதமா் மொ்ஸ் ஆகியோா் காஸாவில் நிலவும் சூழலை பற்றி ஆய்வு செய்தனா். அது மிகவும் கொடுமையானது என்று அவா்கள் ஒப்புக்கொண்டனா். அங்கு உடனடி போா் நிறுத்தம் அவசியம் என்பதை அவா்கள் வலியுறுத்தினா்.

உதவி பொருள்களுக்கான அனைத்து கட்டுப்பாடுகளையும் நீக்கி, காஸாவில் பட்டினியால் வாடும் மக்களுக்கு அவசரமாக இஸ்ரேல் உணவு வழங்க வேண்டும் என மூன்று தலைவா்களும் வலியுறுத்தினா்.