உச்சநீதிமன்றத் தலைமை நீதிபதியாக பி.ஆர்.கவாய் பதவியேற்பு

உச்சநீதிமன்றத்தின் 52-ஆவது தலைமை நீதிபதியாக பூஷண் ராமகிருஷ்ண கவாய் (64) புதன்கிழமை பதவியேற்றார்.

- 

புது தில்லி, மே 14: இதன்மூலம், பட்டியலினைச் சேர்ந்த இரண்டாவது உச்சநீதிமன்றத் தலைமை நீதிபதி என்ற பெருமையை அவர் பெற்றுள்ளார்.

உச்சநீதிமன்றத்தின் 51-ஆவது தலைமை நீதிபதியாக இருந்த சஞ்சீவ் கன்னா செவ்வாய்க்கிழமை ஓய்வு பெற்றார். இதைத் தொடர்ந்து, உச்சநீதிமன்றத்தின் 52-ஆவது தலைமை நீதிபதியாக பி.ஆர்.கவாய் புதன்கிழமை பதவியேற்றார்.

குடியரசுத் தலைவர் மாளிகையில் நடைபெற்ற பதவியேற்பு நிகழ்ச்சியில், குடியரசுத் தலைவர் திரௌபதி முர்மு பி.ஆர்.கவாய்க்கு பதவிப் பிரமாணம் செய்து வைத்தார். பி.ஆர்.கவாய் ஹிந்தி மொழியில் உறுதிமொழி ஏற்றார்.

இந்த நிகழ்ச்சியில் குடியரசு துணைத் தலைவர் ஜகதீப் தன்கர், பிரதமர் நரேந்திர மோடி, மத்திய அமைச்சர்கள் ராஜ்நாத் சிங், ஜெ.பி.நட்டா, அர்ஜுன் ராம் மேக்வால், முன்னாள் குடியரசுத் தலைவர் ராம்நாத் கோவிந்த் உள்ளிட்டோர் கலந்துகொண்டனர்.