மேற்கு வங்க வன்முறை குறித்த வங்கதேச கருத்து: இந்தியா நிராகரிப்பு

மேற்கு வங்க மாநிலம் முர்ஷிதாபாத் மாவட்டத்தில் நிகழ்ந்த வக்ஃப் திருத்தச் சட்ட வன்முறை தொடர்பான வங்கதேசத்தின் கருத்தை மத்திய அரசு வெள்ளிக்கிழமை நிராகரித்தது.

- 

மேலும், இதுபோன்ற தேவையற்ற கருத்துகளை வெளியிடுவதைத் தவிர்த்து, சொந்த நாட்டில் சிறுபான்மையினரின் உரிமைகளைப் பாதுகாப்பதில் கவனம் செலுத்துமாறு வங்கதேச இடைக்கால அரசை மத்திய அரசு கேட்டுக்கொண்டது.

மேற்கு வங்க மாநிலத்தில் முஸ்லிம்கள் அதிகம் வசிக்கும் முர்ஷிதாபாத் மாவட்டத்தில் வக்ஃப் திருத்தச் சட்டத்துக்கு எதிராக நடைபெற்ற போராட்டம் வன்முறையாக மாறியது.

இந்த வன்முறையில் அங்குள்ள ஓர் வீட்டுக்குள் புகுந்த சகோதரர்கள் இருவர் அங்கிருந்த தந்தை, மகனை கத்தியால் குத்திக் கொன்றனர். மேலும், பாது காப்புப் படையினர் நடத்திய துப்பாக்கிச் சூட்டில் ஒருவர் காயமடைந்து பின்னர் உயிரிழந்தார். ஏராளமான வாகனங்கள் தீக்கிரையாக்கப்பட்டன.