மனச்சான்றின்வழி வாழ்வோம்!

மனிதனின் துன்பத்துக்குக் காரணம், அவனது ஆசையே' என்றார் புத்தர். மனிதன் படிக்கும் திறன் பெற்றிருப்பதால் அறிவைப் பெறுகிறான். தன் அனுபவத்தால் பட்டறிவையும் பெறுகிறான். எனவே, அன்றாட நிகழ்வுகளில் எது நல்லது, எது கெட்டது எனப் பிரித்தறியும் திறனையும் பெறுகிறான். ஆறறிவு பெற்ற அவனுக்கு மட்டுமே, அறவழியிலும், அறமற்ற வழியிலும் வாழத் தெரியும். அவன் தன் படிப்பறிவாலும், பட்டறிவாலும் எதிர்காலத்தைப் பற்றிய கனவுகளை வளர்த்துக்கொள்கிறான். அதை நோக்கிப் பயணிக்கவும் செய்கிறான்.

-  என்.பத்ரி

'முற்பகல் செய்யின் பிற்பகல் விளையும்' என்னும் சொல்லாடலும் நம்மிடையே வழக்கில் உள்ளது. மகாபாரதத்தில் பாண்டவர் நல்லவர்களாக விளங்கினர். அவர்களின் சொல்லும் செயலும் ஒன்றாகவே இருந்தன. ஆனால், கௌரவர்கள் பொறாமை, வஞ்சம், சூழ்ச்சி ஆகியவற்றின் இருப்பிடமாக விளங்கினர். எண்ணம், சொல், செயலில் தீயவர்களாக இருந்தனர். அதனால்தான் நல்லவர்களாக இருந்த பாண்டவர்கள் பாரதப்போரில் வெற்றி பெற்றனர்.

நம் மனச்சான்று நல்லவை எல்லாம் அறம் என்பதையும், தீயவையெல்லாம் அறமற்றவை என்பதையும் பொதுவாக ஒப்புக்கொள்கிறது. ஆனால், நம் ஒவ்வொருவருக்கும் வாழ்வில் வெவ்வேறு அறம் சார்ந்த கோட்பாடுகள் இருக்கின்றன. இதற்கெல்லாம் காரணம், நம் வாழ்வைச் சிக்கலில்லாமல் வாழ நமக்குப் பணம் தேவைப்படுகிறது. அதற்காகச் செய்யும் அறமற்ற செயல்களையும் நம் மனச்சான்று அறமுள்ள செயல்களாகவே பார்க்கிறது.

இதன் காரணமாகத்தான் சமூகத்தில் குற்றங்கள் பெருகிவருகின்றன. குற்றவாளிகளின் பணபலத்திற்குச் சட்டத்தின் ஓட்டைகள் துணைபோகின்றன. நீதிமன்றங்கள் அறத்தின் பக்கம் இருந்தாலும், குற்றம் சுமத்தப்பட்டவர்தான் குற்றத்தைச் செய்தார் என்பதை நிரூபிப்பதற்குச் சான்றுகள் தேவைப்படுகின்றன.