தமிழ்நாடு சாரணர் இயக்கத்துக்கு ரூ.10 கோடியில் நவீன தலைமையகம்

தமிழ்நாடு சாரணர் இயக்கத்துக்கு நவீன பயிற்சி வசதிகளுடன் ரூ.10 கோடியில் புதிய தலைமையகம் அமைக்கப்படும் என முதல்வர் மு.க.ஸ்டாலின் தெரிவித்தார்.

- 

திருச்சி மாவட்டம், மணப்பாறையில் ஜன. 28 தொடங்கி நடைபெறும் பாரத சாரணர், சாரணியர் இயக்க வைர விழா, முன்னாள் முதல்வர் கருணாநிதியின் நூற்றாண்டு நினைவு பெருந்திரளணி நிகழ்வில் (ஜம்போரி) 24 மாநிலங்கள், 6 நாடுகளின் (இலங்கை, நேபாளம், மலேசியா, சவூதி அரேபியா, ஆஸ்திரேலியா, ஜப்பான்) 20 ஆயிரத்துக்கும் மேற்பட்ட சாரண, சாரணியர் பங்கேற்று தங்களது திறமைகளை வெளிப்படுத்தினர்.

ஞாயிற்றுக்கிழமை மாலை நடைபெற்ற நிறைவு விழாவில் முதல்வர் மு.க. ஸ்டாலின் பேசியது: 'நாடு விடுதலை பெற குமரி முதல் காஷ்மீர் வரை அனைவரும் ஒற்றுமையாக இருந்து போராடினர். இதைப் போற்றிக் காக்கும் வகையில் நாடு முழுவதும் உள்ள சாரணர் இயக்கத்தினர் மணப்பாறையில் கூடி தங்களது பண்பாட்டை ஒருவருக்கொருவர் பகிர்ந்திருப்பது மகிழ்ச்சியளிக்கிறது.

சாரணர் இயக்கத்திலும் தமிழகம் முன்னிலை: உலகம் முழுவதும் உள்ள இந்த இயக்கத்தில், இந்தியாவில் மட்டுமே 80 லட்சம் பேர் உள்ளனர். இதில் எட்டில் ஒரு பங்காக தமிழகத்தில் 12 லட்சம் பேர் உள்ளனர். சாரணர் இயக்கத்திலும் தமிழகம்தான் முன்னிலை.

இதில் குடிமக்களுக்கான சமூக சேவை, உற்றுநோக்குதல், அறிவுத்திறனை வளர்த்தல் ஆகியவை முக்கிய அம்சங்களாக உள்ளன. ராணுவக் கட்டுப்பாட்டுடன் கூடிய இந்தச் சீருடை இயக்கத்தில் 4 ஆண்டுகளுக்கு ஒருமுறை பெருந்திரளணி நடத்தப்படுகிறது.