மூன்றாவது ஆட்சியில் மும்மடங்கு வேகம்

குடியரசுத் தலைவர் திரௌபதி முர்மு

- 

புது தில்லி, ஜன. 31: 'நாட்டின் வளர்ச்சிப் பயணத்தில் முன்னெப்போதும் இல்லாத சாதனைகளின் மூலம் புதிய சக்தி புகுத்தப்பட்டு வருகிறது; அரசின் தற்போதைய மூன்றாவது பதவிக் காலத்தில் மும்மடங்கு வேகத்தில் பணிகள் மேற்கொள்ளப்பட்டுள்ளன' என்று குடியரசுத் தலைவர் திரௌபதி முர்மு வெள்ளிக்கிழமை தெரிவித்தார்.

மேலும், 'ஒரே நாடு, ஒரே தேர்தல், வக்ஃப் சட்டத் திருத்தம் போன்ற முக்கிய விவகாரங்களில் மத்திய அரசு விரைவான முன்னேற்றத்தை எட்டியுள்ளதாகவும் அவர் கூறினார்.

மக்களவை, மாநில சட்டப்பேரவைகளுக்கு ஒரே நேரத்தில் தேர்தல் நடத்தும் திட்டத்துக்கு எதிர்க்கட்சிகள் கடும் எதிர்ப்பு தெரிவித்துவரும் நிலையில், இத்திட்டத்துக்கான அரசின் உறுதிப்பாட்டை குடியரசுத் தலைவர் குறிப்பிட்டுள்ளார்.

கூட்டுக் கூட்டத்தில் உரை: நாடாளுமன்ற பட்ஜெட் கூட்டத் தொடர் வெள்ளிக்கிழமை தொடங்கியது. நடப்பாண்டின் முதல் கூட்டத் தொடர் என்பதால், இரு அவைகளின் கூட்டுக் கூட்டத்தில் குடியரசுத் தலைவர் திரௌபதி முர்மு உரையாற்றினார்.

அப்போது, மகா கும்பமேளாவில் மௌனி அமாவாசை தினத்தில் கூட்ட நெரிசலில் உயிரிழந்தோர் மற்றும் முன்னாள் பிரதமர் மன்மோகன் சிங்கின் மறைவுக்கு குடியரசுத் தலைவர் திரௌபதி முர்மு இரங்கல் தெரிவித்தார்.