மத்திய அரசு மீது உச்சநீதிமன்றம் அதிருப்தி

"நாடாளுமன்றத்தால் இயற்றப்பட்ட அணைப் பாதுகாப்புச் சட்டம் இருந்தும், நிர்வாகம் இன்னும் நீண்ட தூக்கத்திலிருந்து மீளவில்லை என்று முல்லைப் பெரியாறு அணை தொடர்பான வழக்கில் உச்சநீதிமன்றம் புதன்கிழமை தனது அதிருப்தியை வெளிப்படுத்தியது.

- நமது நிருபர்

புது தில்லி, ஜன.8:

இது தொடர்பான வழக்கு உச்சநீதிமன்றத்தில் நீதிபதிகள் சூர்ய காந்த், தீபாங்கர் தத்தா மற்றும் உஜ்ஜல் புயான் ஆகியோர் அடங்கிய அமர்வு முன் விசாரணைக்கு வந்தது.

அப்போது, 130 ஆண்டுகள் பழமையான இந்த அணையின் பாதுகாப்பு தொடர்பாக உச்சநீதிமன்றத்தில் நடந்து வரும் விசாரணை நடவடிக்கைகளைத் தாமதப்படுத்தும் வகையில், 2021-ஆம் ஆண்டு அணை பாதுகாப்புச் சட்டத்தை மத்திய அரசு இயற்றியதாகவும், அப்போதிருந்து எதுவும் நடக்கவில்லை என்று கேரள அரசுத் தரப்பில் தெரிவிக்கப்பட்டது.

அப்போது, சட்டத்தின் கீழ் பரிந்துரைக்கப்பட்ட அணையின் பாதுகாப்புக்கு தேசியக் குழுவை மத்திய அரசு இன்னும் அமைக்கவில்லை என்று நீதிபதிகள் அமர்வு தெரிவித்தனர்.