ஒரே நாடு ஒரே தேர்தல்: நாடாளுமன்றக் குழு முதல்முறையாக ஆலோசனை

பாஜக-எதிர்க்கட்சிகள் கருத்து மோதல்

- 

புது தில்லி, ஜன. 8: 'ஒரே நாடு ஒரே தேர்தல்' தொடர்பான நாடாளுமன்றக் கூட்டுக் குழுவின் முதல் கூட்டம், தில்லியில் புதன்கிழமை நடைபெற்றது. இதில் பாஜக-எதிர்க்கட்சி உறுப்பினர்கள் இடையே கருத்து மோதல் ஏற்பட்டது.

ஒரே நேரத் தேர்தல் நடைமுறைக்கு ஆதரவாக பாஜக உறுப்பினர்கள் பேசிய நிலையில், எதிர்க்கட்சியினர் ஆட்சேபக் கருத்துகளை முன்வைத்தனர்.

மக்களவை, மாநிலங்கள் மற்றும் யூனியன் பிரதேசங்களின் பேரவைகளுக்கு ஒரே நேரத்தில் தேர்தல் நடத்தும் நடைமுறையை அமல்படுத்த மத்திய பாஜக அரசு திட்டமிட்டுள்ளது.

இதற்காக அரசமைப்புச் சட்டம் 129-ஆவது திருத்த மசோதா மற்றும் யூனியன் பிரதேசங்கள் சட்டத் திருத்த மசோதா ஆகிய இரு மசோதாக்கள், அண்மையில் நடைபெற்ற குளிர்காலக் கூட்டத்தொடரின்போது மக்களவையில் எதிர்க்கட்சிகளின் கடும் எதிர்ப்புக்கு இடையே அறிமுகப்படுத்தப்பட்டன. பின்னர், இரு மசோதாக்களும் நாடாளுமன்றக் கூட்டுக் குழு பரிசீலனைக்கு அனுப்ப முடிவு செய்யப்பட்டது.