திருவண்ணாமலையில் ஸ்ரீசந்திரசேகரர், 63 நாயன்மார்கள் வீதியுலா

திருவண்ணாமலை ஸ்ரீ அருணாசலேஸ்வரர் கோயில் தீபத் திருவிழாவின் 6-ஆவது நாளான திங்கள்கிழமை காலை வெள்ளி யானை வாகனத்தில் ஸ்ரீசந்திரசேகரர் மற்றும் 63 நாயன்மார்கள் வீதியுலா விமரிசையாக நடைபெற்றது.

- 

அருணாசலேஸ்வரர் கோயில் கார்த்திகை மகா தீபத் திருவிழா, கடந்த 4-ஆம் தேதி கொடியேற்றத்துடன் தொடங்கியது. அன்று முதல் தினமும் காலை, இரவு வேளைகளில் உற்சவமூர்த்திகள் வீதியுலா நடைபெற்று வருகிறது.

வெள்ளி யானை வாகனத்தில் ஸ்ரீசந்திரசேகரர் வீதியுலா: திருவிழாவின் 6-ஆவது நாளான திங்கள்கிழமை காலை 10 மணிக்கு யானை வாகனத்தில் ஸ்ரீவிநாயகர், வெள்ளி யானை வாகனத்தில் ஸ்ரீசந்திரசேகரர் வீதியுலா நடைபெற்றது.

இரவு 10.30 மணிக்கு மூஷிக வாகனத்தில் விநாயகர், மயில் வாகனத்தில் வள்ளி தெய்வானை சமேத முருகப்பெருமான், பழமையான வெள்ளித் தேரில் அருணாசலேஸ்வரர், வெள்ளி விமான வாகனங்களில் பராசக்தியம்மன், சண்டிகேஸ்வரர் உள்ளிட்ட பஞ்சமூர்த்திகள் வீதியுலா நடைபெற்றது. கோயில் ராஜகோபுரம் எதிரிலிருந்து புறப்பட்ட உற்சவர் சுவாமிகள் மாட வீதிகளில் வலம் வந்து நிலையை அடைந்தனர்.