டங்ஸ்டன் சுரங்க உரிமரத்து தீர்மானம்

மதுரை மாவட்டத்தில் டங்ஸ்டன் சுரங்கம் அமைக்க அளித்த உரிமத்தை மத்திய அரசு ரத்து செய்ய வேண்டும் என்று வலியுறுத்தி தமிழக சட்டப்பேரவையில் திங்கள்கிழமை ஒருமனதாகத் தீர்மானம் நிறைவேற்றப்பட்டது.

- 

மதுரை மாவட்டத்தில் டங்ஸ்டன் சுரங்கம் அமைப்பதற்கு எதிர்ப்பு தெரிவித்து அப்பகுதியைச் சேர்ந்த மக்கள் போராட்டம் நடத்தி வந்தனர். இந்நிலையில், டங்ஸ்டன் சுரங்க உரிமத்தை மத்திய அரசு ரத்து செய்ய வலியுறுத்தி தமிழக அரசின் சார்பில் சட்டப்பேரவையில் தீர்மானம் கொண்டுவரப்படும் என்று அறிவிக்கப்பட்டிருந்தது.

தனித் தீர்மானம்: அதன்படி, சட்டப்பேரவையில் திங்கள்கிழமை கேள்வி நேரம் முடிந்ததும், நீர்வளத் துறை அமைச்சர் துரைமுருகன் அரசின் தனித் தீர்மானத்தைக் கொண்டுவந்தார்.

அதன் விவரம்: மதுரை மாவட்டம், மேலூர் வட்டம் நாயக்கர்பட்டி கிராமத்தில் டங்ஸ்டன் கனிமச் சுரங்கம் அமைப்பதற்கான உரிமத்தை ஹிந்துஸ்தான் ஜிங்க் நிறுவனத்துக்கு மத்திய அரசு வழங்கியுள்ளது. இத்தகைய இன்றியமையாத மற்றும் முக்கியக் கனிமங்களுக்கான உரிமங்களை மாநில அரசுகளின் அனுமதியின்றி, மத்திய அரசு ஏலம் விடக்கூடாது என்று 2023, அக்டோபர் 3-இல் தமிழக அரசு வலியுறுத்தியிருந்தும், இந்த எதிர்ப்பைக் கருத்தில்கொள்ளாமல், மத்திய அரசு இத்தகைய ஏல நடவடிக்கையை மேற்கொண்டது கண்டிக்கத்தக்கது.