அரசு மருத்துவர்கள் இன்று நூதன போராட்டம்

சென்னை, நவ. 25: அரசு மருத்துவர்களை தரக்குறைவாக நடத்தும் உயர் அதிகாரிகளைக் கண்டித்தும், பல்வேறு கோரிக்கைகளை வலியுறுத்தியும் செவ்வாய்க்கிழமை (நவ. 26) நூதன போராட்டத்தை முன்னெடுக்கப் போவதாக அரசு மருத்துவர் சங்கத்தினர் அறிவித்துள்ளனர்.

- 

சென்னையில் தேசிய நல்வாழ்வுத் திட்ட அலுவலகத்தில் அண்மையில் நடைபெற்ற மக்கள் நல்வாழ்வுத் துறை ஆய்வுக் கூட்டத்தில் பங்கேற்ற அதிகாரி ஒருவர், மருத்துவத் துறையினரையும், மருத்துவர்களையும் திட்டியதாகத் தெரிகிறது. இதையடுத்து, அரசு மருத்துவர்களைத் தரக்குறைவாகப் பேசும் உயர் அதிகாரிகள் மீது நடவடிக்கை எடுக்க வேண்டும் என்பது உள்ளிட்ட பல்வேறு கோரிக்கைகளை வலியுறுத்தி தமிழகம் முழுவதும் அரசு மருத்துவர்கள் ஆர்ப்பாட்டம், தர்னா உள்ளிட்ட பல்வேறு போராட்டங்களை நடத்தி வருகின்றனர்.

இதன்படி, ஜனநாயக தமிழ்நாடு அரசு டாக்டர்கள் சங்கம், மற்றும் அரசு மருத்துவர்கள் சங்க கூட்டமைப்பு சார்பில் சென்னை அரசு ஸ்டான்லி மருத்துவக் கல்லூரி மருத்துவமனையில் மருத்துவர்கள் தர்னாவில் ஈடுபட்டனர்.