பேருந்து, ரயில் நிலையங்களில் கூட்ட நெரிசல்

தீபாவளி பண்டிகையை சொந்த ஊரில் கொண்டாட பொதுமக்கள் ஏராளமானோர் சென்னையிலிருந்து செவ்வாய்க்கிழமை புறப்பட்டுச் சென்றதால் மாநகர மட்டுமல்லாது புறநகர் பகுதிகளிலும் கடும் போக்குவரத்து நெரிசல் ஏற்பட்டது.

- 

தீபாவளி பண்டிகை வியாழக்கிழமையில் கொண்டாடப்படவுள்ள நிலையில், சென்னையிலிருந்து சொந்த ஊர்களுக்கு செல்பவர்களின் வசதிக்காக திங்கள், செவ்வாய், புதன்கிழமைகளில் சிறப்பு பேருந்துகளும் இயக்கப்படும் என போக்குவரத்துத் துறை அறிவித்திருந்தது.

இதனால், திங்கள் கிழமை பலர் தங்கள் சொந்த ஊர்களுக்கு புறப்பட்டுச் சென்ற நிலையில், செவ்வாய்க்கிழமையும் பலர் சொந்த ஊர்களுக்கு புறப்பட்டுச் சென்றனர்.

ஏராளமான தொழில்நிறுவனங்கள், அலுவலகங்களில் பணியாற்றுபவர்கள் தங்கள் பணிகளை முடித்துக் கொண்டு மாலையில், தங்கள் பயணத்தை மேற்கொண்டனர். இதனால், மாலை சுமார் 4 மணியிலிருந்து சென்னையின் முக்கிய பகுதிகளான அண்ணா சாலை, பூந்தமல்லி சாலை, ஜிஎஸ்டி சாலை, கிண்டி, நுங்கம்பாக்கம், மயிலாப்பூர், எழும்பூர் உள்ளிட்ட பகுதிகளில் கடும் போக்குவரத்து நெரிசல் ஏற்பட்டது.