அங்கீகாரம் மறுக்கப்பட்ட காமெடியன்

தமிழ் சினிமா உலகில் அதிகம் கொண்டாடப்படும் நடிகர்கள் என்றால் அது, கதாநாயகர்கள், கதாநாயகிகள் மட்டும்தான். இதுவரை குணச்சித்திர கதாபாத்திரங்களில் நடிக்கும் நடிகர்களை தமிழ் சினிமா ரசிகர்கள் பெருமளவில் கொண்டாடவில்லை, அவர்களின் நடிப்பை அங்கீகரிக்கவில்லை என்பதை ஏற்றுக்கொள்ள வேண்டும். அதேபோல் காமெடி நடிகர்கள் என்றாலும் நாகேஷ், மனோரமா, கவுண்டமணி, செந்தில், கோவை சரளா, வடிவேலு, சந்தானம் என இன்றைக்கு வரை குறிப்பிட்ட சிலரது திறமையை மட்டுமே தமிழ் சினிமா ரசிகர்கள் அங்கீகரித்துள்ளார்கள். ஆனால் பெரிய அளவில் சினிமா இயக்குனர்களால் அங்கீகரிக்க மறுக்கப்பட்ட காமெடி நடிகர்களில் ஒருவர் ஓமகுச்சி நரசிம்மன் பற்றிய தொகுப்பு இது.

- 

ஒல்லியான உடல், தனித்துவமான உடல்மொழி, காதோரம் உள்ள நரைத்த முடி என பார்த்தாலே நகைச்சுவை உணர்வை வரவழைக்கும் தோற்றத்தை உடையவர் நரசிம்மன். இவரது தோற்றத்தினாலேயே ‘ஓமக்குச்சி' நரசிம்மன் என்ற பெயர் பெற்றார் அவர்.

1936ம் ஆண்டு திருச்சியை பூர்வீகமாக கொண்ட பெற்றோருக்கு கும்பகோணத்தில் பிறந்தவர் தான் நரசிம்மன். கோயில் நகரத்தில் பிறந்த இவர் படிப்பில் மிகுந்த ஆர்வம் கொண்டிருந்தார். அதன்பேரில் கும்பகோணம் அரசு பள்ளியில் தனது பள்ளி கல்வியை தொடங்கினார். வகுப்பில் முதல் மாணவராக தேர்ச்சி பெற்றார். படிப்பில் படு கெட்டியாகவும், நடிப்பில் படு சுட்டியாகவும் வளர்ந்து வந்த நரசிம்மன் சிறுவயதிலிருந்தே கலையின் மீது மிகுந்த ஆர்வம் கொண்டிருந்தார். இதனால் பள்ளியில் நடக்கும் அனைத்து கலை நிகழ்ச்சிகளிலும் கலந்து கொண்டு பரிசு வென்று தனது கலை தாகத்தை தீர்த்துக்கொண்டார்.

மேடை நாடகம், கலை நிகழ்ச்சிகள் மூலம் தனது நடிப்பு பயணத்தை தொடங்கிய நரசிம்மன் சினிமா வாய்ப்பும் தேடி அலைந்தார். நாடகங்களில் குணச்சித்திர வேடம் நகைச்சுவை வேடங்களில் நடித்து வந்தார். அப்படி அவர் நடித்த ஒரு நாடகத்தை பார்க்க வந்த ஜெமினி ஸ்டுடியோஸ் குழுவினர், நரசிம்மனின் நடிப்பு திறமையை பார்த்து அவரை தங்களது அடுத்த படத்தில் நடிக்க வைக்க திட்டமிட்டனர்.

அதன்படி 1953ம் ஆண்டு ஜெமினி ஸ்டுடியோஸ் மிக பிரமாண்டமாக தயாரித்து கொத்தமங்கலம் சுப்பு இயக்கத்தில் கே.பி. சுந்தராம்பாள் நடித்து வெளியான 'அகத்தியர்' படம் மூலம் முதன்முதலில் திரையில் தோன்றினார் நரசிம்மன். பெற்றோரின் அனுமதியுடன் தனது 16 வயதில் நடிப்பு பயணத்தை தொடங்கினார் நரசிம்மன். அதன்பிறகு சிறு சிறு வேடங்களில் பல படங்களில் நடித்து வந்தார். அதே நேரத்தில் படிப்பில் மிக கெட்டிக்காரரான அவர் அதையும் விட்டுவிடவில்லை. பள்ளி படிப்பை முடித்த பிறகு தனது இளங்கலை பட்டப்படிப்பை முடித்தார்.