மலிவு விலையில் வாங்கப்படும் ரஷ்ய கச்சா எண்ணெயால் கொள்ளை லாபம் யாருக்கு?

என்ன தான் மிரட்டினாலும், என்ன தான் கெஞ்சினாலும் உக்ரைன் மீதான போரை நிறுத்த மறுக்கிறார் ரஷ்ய அதிபர் புடின். கிட்டத்தட்ட மூன்று ஆண்டுகளாக நீடிக்கும் இந்தப் போரை நிறுத்த முடியாமல் தவிக்கிறார் டிரம்ப். உக்ரைனுக்கு அமெரிக்கா மற்றும் ஐரோப்பிய நாடுகள் உதவி செய்தன. செய்து வருகின்றன. அதனால் சமாளிக்கிறது. ஆனால் ரஷ்யா எப்படி சமாளிக்கிறது? அந்த வியூகத்தில் யோசித்து இப்போது இந்தியாவுக்கு 500 சதவீத வரி விதிக்கும் முடிவுக்கு வந்திருக்கிறார் அமெரிக்க அதிபர் டிரம்ப். உக்ரைன்-ரஷ்யா போருக்கும் இந்தியாவுக்கு 500 சதவீத வரியை அமெரிக்கா விதிப்பதற்கும் என்ன தொடர்பு என்று பார்த்தால்தான் தெரியும் ரஷ்யா-இந்தியா இடையிலான கச்சா எண்ணெய் இறக்குமதி வர்த்தகம்.

- 

உக்ரைன் போருக்கு முன்னர் ஐரோப்பிய யூனியன் நாடுகளுக்கு கச்சா எண்ணெய் வர்த்தகம் செய்து வருவாய் பார்த்தது ரஷ்யா. ஆனால் உக்ரைனைத் தாக்கியதால் ஒரே நாளில் ரஷ்யாவுடனான அனைத்து வர்த்தகங்களையும் நிறுத்திவிட்டன ஐரோப்பிய யூனியன் நாடுகள். தவித்துப்போன ரஷ்யா குறைந்த விலையில் கச்சா எண்ணெய் தருவதாகக் கூறிப்பார்த்தும் யாரும் சீண்டவில்லை. இந்த நிலையில்தான் இந்தியாவும், சீனாவும் மிகவும் தைரியமாக ரஷ்யாவிடம் இருந்து கச்சா எண்ணெய் இறக்குமதி செய்ய முடிவெடுத்தன. குறிப்பாக 2022-க்குப் பிறகு, இந்தியா ரஷ்யாவின் கச்சா எண்ணெய் வாங்கும் முக்கிய நாடுகளில் ஒன்றாக மாறியுள்ளது. 2025 மே மாதத்தில் மட்டும் இந்தியா ரஷ்யாவிலிருந்து ஒரு நாளைக்கு சுமார் 19.6 லட்சம் பீப்பாய்கள் கச்சா எண்ணெயை இறக்குமதி செய்தது. இது கடந்த பத்து மாதங்களில் இல்லாத அளவு என்கிறது வர்த்தகப் பிரிவு. இந்த இறக்குமதி அதிகரித்துக்கொண்டே செல்கிறது. அதுவும் பேரல் 75 டாலர் என்ற குறைந்த விலையில். இதேபோல் சீனாவும் ரஷ்யாவிடம் இருந்து குறைந்த விலையில் கச்சா எண்ணெய் இறக்குமதி செய்கிறது. இப்போது இந்தியா, சீனாவுக்கு ரஷ்யாவின் கச்சா எண்ணெய்தான் மிகப்பெரிய பலம். அதேபோல் உக்ரைனுக்கு எதிரான 3 ஆண்டுகாலப் போரில் எந்தவிதப் பொருளாதார நெருக்கடியும் இல்லாமல் ரஷ்யா கடந்து செல்வதற்கும் இந்த வர்த்தகந்தான் காரணம்.

இதை அறிந்தும் விடுவாரா டிரம்ப்? அதனால் தான் ரஷ்யாவிடமிருந்து கச்சா எண்ணெய் வாங்கும் நாடுகள் மீது 500 விழுக்காடு வரி விதிப்பது குறித்து அமெரிக்காவில் விவாதம் நடக்கிறது. அமெரிக்க நாடாளுமன்றத்தில் முன்மொழியப்பட்டுள்ள ரஷ்யத் தடைகள் சட்ட மசோதா 2025 அமல்படுத்தப்பட்டால், ரஷ்யாவிலிருந்து கச்சா எண்ணெய், இயற்கை எரிவாயு, பெட்ரோலியப் பொருட்கள் அல்லது யுரேனியம் வாங்கும் நாடுகளிலிருந்து அமெரிக்காவுக்கு இறக்குமதி செய்யப்படும் பொருட்களுக்கு 500 விழுக்காடு வரி விதிக்கப்படும். இது இந்தியா, சீனா போன்ற ஆசிய நாடுகள் மீது நேரடித் தாக்கத்தை ஏற்படுத்தும்.