குமரியில் கட்டுப்பாட்டில் வருமா கஞ்சா புழக்கம்?

மாணவர்களிடையே விழிப்புணர்வு உருவாக்குவதை முதன்மை நோக்கமாகக் கொண்டு பள்ளிகளில் 'போதைப்பொருள் எதிர்ப்பு மன்றம்' கடந்த ஆண்டு தொடங்கப்பட்டது.

- 

போதைப்பொருள் இல்லாத தமிழ்நாடு என்பது போதைப்பொருள் மன்றத்தின் குறிக்கோளாகும். போதைப் பொருள் தடுப்பு விழிப்புணர்வை நிலைநிறுத்துவதற்கான குறிக்கோளை அடிப்படையாகக் கொண்டு அந்த முயற்சியில் மாணவர்களைப் பங்கேற்கச் செய்யும் நோக்கத்துடன் திட்டங்கள் உருவாக்கப்பட்டுள்ளது.

போதைப்பொருள் ஒரு தனி நபரின் உடல் அல்லது மனம் சார்ந்த செயல்பாட்டை மாற்றும் எந்தவொரு ரசாயனமும் போதைப்பொருள் ஆகும். எந்தவித மருத்துவ நோக்கமின்றி ஒரு மருந்து அல்லது போதைப்பொருளை அதன் அளவு, வீரியம் அல்லது பயன்பாட்டு முறையை மீறி உடல் அல்லது மனம் சார்ந்த செயல்பாடுகளுக்குத் தீங்கு விளைவிக்கும் வகையில் பயன்படுத்துவது போதைப்பொருள் முறைகேடு அல்லது தவறான பயன்பாடு எனப்படுகிறது.

போதைப் பொருட்களைத் தொடர்ந்து பயன்படுத்திக் கொண்டே இருப்பதால் நாளடைவில் அவை பழக்கமாகிவிடும். ஆரம்பத்தில் சிறிய அளவில் பயன்படுத்தத் தோன்றினாலும் நாளடைவில் அதே உணர்வைப் பெற அதிக அளவில் பயன்படுத்தும் நிலை ஏற்படும். இதனைப் போதைப்பொருள் சகிப்புத்தன்மை என்கின்றனர். ஒருவர் போதைப்பொருளைப் பயன்படுத்தத் தொடங்கி அதனைத் தொடர்ந்து பயன்படுத்தியே ஆக வேண்டும் என்ற ஒரு நிலை வரும்போது அது சார்பு நிலை என்று அழைக்கப்படுகிறது. இந்த நிலையில் அவர்களால் அந்தப் போதைப் பொருள் இல்லாமல் இருக்க முடியாது. ஏனெனில் அவர்களுடைய உடலும், மனமும் அதைச் சார்ந்தே செயல்படத் தொடங்கிவிடும். பொதுவாகப் பயன்படுத்தப்படும் போதைப் பொருட்களாக இயற்கையாகக் கஞ்சா, பாதி செயற்கையான ஹெராயின், செயற்கைப் பொருளான மெத்தபேட்டமைன் உள்ளது.

மாணவர்கள் ஆர்வத்தினாலோ அல்லது நண்பர்கள் அழுத்தம் காரணமாகவோ தெரியாத போதைப் பொருட்களைப் பயன்படுத்த வேண்டாம். தற்செயலாகப் போதைப் பொருட்களை உட்கொண்டிருந்தால், அதனை உங்கள் பெற்றோரிடமிருந்தோ அல்லது ஆசிரியர்களிடமிருந்தோ மறைக்கக் கூடாது. உடனடியாக உதவியை நாட வேண்டும். தீங்கு விளைவிக்கும் போதைப் பொருட்கள் பழக்கத்தை விட்டுவிட்டுச் சரியான ஆலோசனை அல்லது ஆதரவைப் பெறுவதில் தாமதிக்கக் கூடாது. ஆரம்ப கால உதவி பெரிய வித்தியாசத்தை ஏற்படுத்தும்.