பஞ்சாயத்து முடிந்தது, பணத்தை எண்ணி வையுங்கள்...

மாநில அரசுகள் ஒன்ற முடியாத அளவிற்கு முரண்பாடு மிகுந்த கொள்கை திட்டங்களை ஒன்றிய பாஜக அரசு வகுத்து திணித்து வருகிறது. அதில் ஒன்றுதான் புதிய கல்விக் கொள்கை திட்டம். மும்மொழிக் கொள்கையை அமல்படுத்தினால் தான், பள்ளிக் கல்வித்துறைக்கு எஞ்சிய நிதியை விடுவிப்போம் என்று ஒன்றிய அரசு பிடிவாதம் பிடிக்கிறது. 2024-25-ம் கல்வியாண்டில் தமிழகத்துக்கு ரூ.3,586 கோடி ஒதுக்கீடு செய்யப்பட்டது. இதில் ஒன்றிய அரசின் பங்கு ரூ.2,152 கோடி. இதற்கான முன்மொழிவுகள் ஏப்ரல் மாதமே சமர்ப்பிக்கப்பட்டும் முதல் தவணையான ரூ.573 கோடியும் முந்தைய ஆண்டுக்கான ரூ.249 கோடியும் விடுவிக்கவில்லை. பிஎம் ஸ்ரீ பள்ளிகளில் தேசிய கல்விக் கொள்கையை முழுமையாக அமல்படுத்துவதை நிதியை பெறுவதற்கான முன் நிபந்தனையாக ஒன்றிய அரசு முயற்சிக்கிறது.

- 

இந்நிலையில், ஒன்றிய (தேசிய) கல்வி கொள்கையை அமல்படுத்த மாநிலங்களுக்கு உத்தரவிடக் கோரி வழக்கறிஞர் ஜி.எஸ் மணி என்பவர் உச்ச நீதிமன்றத்தில் தாக்கல் செய்த மனுவில், 'ஒன்றிய (தேசிய) கல்வி கொள்கையை அமல்படுத்த தமிழ்நாடு, மேற்குவங்கம் மற்றும் கேரளா போன்ற மாநிலங்கள் எதிர்ப்பு தெரிவிக்கின்றன. ஒன்றிய (தேசிய) கல்வி கொள்கையை அம்மாநிலங்கள் தேவையின்றி அரசியல் பிரச்சினையாக்குகின்றன' எனக் குறிப்பிட்டு, "ஒன்றிய (தேசிய) கல்வி கொள்கையை அமல்படுத்த மாநிலங்களுக்கு உத்தரவிட வேண்டும்' என்று கேட்டிருந்தார். மனுவை விசாரித்த நீதிபதிகள் ஜே.பி. பர்திவாலா, ஆர். மகாதேவன் ஆகியோர்", "தேசிய கல்வி கொள்கையை ஏற்கும்படி எந்த மாநிலத்தையும் உச்ச நீதிமன்றம் கட்டாயப்படுத்த முடியாது. மாநிலத்தின் செயல்பாடு மக்களின் அடிப்படை உரிமையை மீறுவதாக இருந்தால் மட்டுமே அதில் நீதிமன்றம் தலையிடலாம்' எனக்கூறி மனுவை தள்ளுபடி செய்தனர்.