రాచకొండకు గుర్తింపు తెచ్చిన సుధీర్ బాబు

దేశంలోనే అతిపెద్ద పోలీస్ కమిషనరేట్ ఒకటిగా ఉన్న రాచకొండ పోలీస్ కమిషనర్గా బాధ్యతలు నిర్వహిస్తున్న గొట్టి సుదీర్బాబు విలక్షణమైన పనితీరుతో పోలీస్ శాఖలో స్వల్పకాలంలో మంచి గుర్తింపు సాధించారు.

- - వి. శంకరశర్మ

దేశంలోనే అతిపెద్ద పోలీస్ కమిషనరేట్ ఒకటిగా ఉన్న రాచకొండ పోలీస్ కమిషనర్గా బాధ్యతలు నిర్వహిస్తున్న గొట్టి సుదీర్బాబు విలక్షణమైన పనితీరుతో పోలీస్ శాఖలో స్వల్పకాలంలో మంచి గుర్తింపు సాధించారు. రాజకీయ నేపథ్యం కలిగిన కుటుంబంలో పెరిగినప్పటికీ పోలీస్ అధికారిగా సుధీర్ బాబు రాజకీయాలకు అతీతంగా పనిచేస్తున్నారు. ఈయన తండ్రి జి. భూపతి ఉమ్మడి కరీంనగర్ జిల్లా నేరెళ్ల నియోజకవర్గం నుండి శాసనసభ్యుడిగా, పెద్దపల్లి నియోజకవర్గం నుండి పార్లమెంటు సభ్యుడిగా ప్రాతినిధ్యం వహించారు. సుధీర్ బాబు మామ ఎడ్లీ మల్లయ్య తెలుగుదేశం ఆవిర్భావం నుండి క్రియాశీలంగా వ్యవహరించడమే కాకుండా ఉమ్మడి ఆంధ్రప్రదేశ్ రాష్ట్రంలో ఆంధ్రప్రదేశ్ పబ్లిక్ సర్వీస్ కమిషన్ సభ్యుడిగా బాధ్యతలు నిర్వహించి అప్పటి ముఖ్యమంత్రి ఎన్.టి.రామారావు ఆదరాభిమానాలు చురగొన్నారు.

కాగా సుధీర్ బాబు గ్రూప్ వన్ పరీక్షలు రాసి ప్రతిభ ఆధారంగా డీఎస్పీగా ఎంపిక అయ్యారు. పలు సమస్యాత్మక జిల్లాల్లో, నక్సల్స్ ప్రభావిత ప్రాంతాల్లో డిఎస్పీగా పనిచేసి అధికారుల ప్రశంసలు పొందారు. అనంతరం సీనియారిటీ ఆధారంగా 2001 బ్యాచ్ ఐపీఎస్ అధికారిగా ఎంపిక అయ్యారు. తెలుగుదేశం ప్రభుత్వంలో రాయలసీమ ప్రాంత రీజనల్ ఇంటెలిజెన్స్ అధికారిగా పనిచేశారు. రాయలసీమ ప్రాంతంలోని ఫ్యాక్షనిజం, నక్సలిజంపై ఎప్పటికప్పుడు నివేదికలు అందజేసి ప్రభుత్వాన్ని అప్రమత్తం చేశారు. కర్నూలు, చిత్తూరు జిల్లాలోని పీపుల్స్ వార్ కార్యకలాపాలపై, రాయలసీమలోని ఫ్యాక్షనిస్టులపై నిఘా ఉంచి అక్కడ శాంతిభద్రతలు కాపాడటానికి సహకరించారు.