കല്യാണക്കാലത്തെ അക്കിടി

ഓരോരുത്തരുടെ പറച്ചിൽ കേട്ടാൽ തോന്നും സപ്പ്‌ളൈക്കോയിൽ സാധനങ്ങൾ ഇല്ലാത്തതും ഓണത്തിന് സൗജന്യമായി കിറ്റ് കൊടുക്കാത്തതുമൊക്കെ ഞങ്ങൾ ജീവനക്കാരുടെ കുറ്റം കൊണ്ടാണെന്ന്.

- ബാലു കല്ലമ്പളളി

മകളുടെ വിവാഹം ക്ഷണിക്കാനിറങ്ങിയ സപ്ലൈക്കോയിലെ താൽക്കാലിക സെയിൽസ്മാനായ അംബുജാക്ഷൻ ഭാര്യ വിനോദിനിയോട് പറഞ്ഞു.

 "ഈ ഓണക്കാലത്തുതന്നെ നമ്മൾ വിവാഹം നടത്താൻ തീരുമാനിച്ചത് ബുദ്ധിമോശമായിപ്പോയി. ഓരോരുത്തരുടെ പറച്ചിൽ കേട്ടാൽ തോന്നും സപ്പ്‌ളൈക്കോയിൽ സാധനങ്ങൾ ഇല്ലാത്തതും ഓണത്തിന് സൗജന്യമായി കിറ്റ് കൊടുക്കാത്തതുമൊക്കെ ഞങ്ങൾ ജീവനക്കാരുടെ കുറ്റം കൊണ്ടാണെന്ന്. കടയിൽ ഇരുന്നാൽ അവിടെ വരുന്നവരുടെ തെറി കേട്ടാൽ മതിയായിരുന്നു. ഇതിപ്പം അങ്ങോട്ടുചെന്ന് പരാതികൾ കേൾക്കേണ്ട സ്ഥിതിയായി.

അതുതന്നെ വിനോദിനിക്കും തോന്നി. "ഇനി പറഞ്ഞിട്ട് കാര്യമില്ലല്ലൊ, കല്യാണം ആറ് മാസങ്ങൾക്ക് മുൻപ് നിശ്ചയിച്ചതല്ലേ? നമ്മളറിഞ്ഞോ ഇങ്ങനെയൊക്കെ വരുമെന്ന്.

ഒരു വലിയ ഇരുനിലവീടിന്റെ മുന്നിൽ സ്കൂട്ടർ നിർത്തിയിട്ട് അംബുജാക്ഷൻ ഭാര്യയോട് പറഞ്ഞു. “ഇറങ്ങ് ഇത് നമ്മുടെ റിട്ടയേഡ് സബ്റജി സാർ കുശലകുമാരി മാഡത്തിന്റെ വീടാ. കോടീശ്വരിയാണെങ്കിലും മാഡം സ്ഥിരമായി സപ്ലൈക്കോയിൽ സാധനം വാങ്ങാൻ വരുന്നതാ. വിളിച്ചില്ലെങ്കിൽ അത് പരാതിയാകും.

ഗേറ്റ് കടന്ന് ആഗതർ അകത്തേക്ക് പ്രവേശിക്കുമ്പോൾ കണ്ടു, മുറ്റത്ത് അഞ്ചോ ആറോ തേങ്ങ അരിഞ്ഞ് ഒരു പഴമുറത്തിൽ ഉണക്കാനിട്ടിരിക്കുന്നത്. കാക്കയെ അടിക്കാനായി ഉമ്മറപ്പടിയിൽ കയ്യിലൊരു കമ്പുമായി കഷണ്ടിത്തലയനും കട്ടിമീശക്കാരനുമായ ഒരജാന ബാഹുവും ഇരിപ്പുണ്ട്. അംബുജാക്ഷൻ അടക്കിയ സ്വരത്തിൽ ഭാര്യയോട് പറഞ്ഞു. മാഡത്തിന്റെ ഹസ്ബന്റാ, എസ്.ഐ.യായി റിട്ടയർ ചെയ്ത ആളാ.

സർവീസിലിരിക്കുമ്പോൾ പുലിയായിരു ന്നു. പക്ഷേ ദോഷം പറയരുതല്ലോ വഴിയാംവണ്ണം കണ്ടാൽ വഴിവിട്ട് ആരേയും സഹായിക്കുന്ന മനസ്ഥിതിയും ഉണ്ടായിരുന്നു.

ആഗതരെ കണ്ട് ഗൃഹനാഥൻ ഗൗരവം കൈവിടാതെ ചോദിച്ചു ങും, ആരാ? എന്തുവേണം?