બાળકો-કિશોરોનાં હૃદયને નબળાં બનાવતી કમજોર કડી કઈ?

તાજેતરમાં રાજકોટ, નવસારીમાં અમુક વિદ્યાર્થીનાં હાર્ટ અટેકથી અકાળે મૃત્યુ થયાં. શા માટે બાળકો, કિશોરોમાં હાર્ટને લગતી સમસ્યા જોવા મળી રહી છે? શું મગજ પરનો ભાર છાતી સુધી પહોંચીને દિલનો ખેલ બગાડે છે? બાળકોનાં શારીરિક-માનસિક સ્વાસ્થ્ય માટે કરવું તો શું કરવું?

- દેવેન્દ્ર જાની (રાજકોટ) । મહેશ શાહ હેતલ રાવ (અમદાવાદ)

વાત નવસારી નગરીની છે, જ્યાં ગયા અઠવાડિયે મેઘરાજાએ એમનું રૌદ્ર સ્વરૂપ બતાવ્યું. અહીંની એક શાળામાં ૧૨મા ધોરણમાં ભણતી કન્યા રિસેસ બાદ પોતાના ક્લાસમાં જવા દાદર ચડી રહી હતી કે અચાનક એ પરસેવાથી નીતરવા લાગી, શ્વાસ લેવામાં એને તકલીફ થવા લાગી. એણે રૅલિંગ પકડવાનો પ્રયાસ કર્યો, એની સખી અને એક ટીચરે એને ટેકો આપવાનો પ્રયાસ કર્યો, પણ એ દાદર પર જ ફસડાઈ ગઈ. સ્કૂલ-સ્ટાફે તરત એને નજીકની હૉસ્પિટલમાં મોકલવાની વ્યવસ્થા કરી, જ્યાં ડૉક્ટરે એને તપાસી મૃત જાહેર કરી. મૃત્યુનું કારણઃ કાર્ડિયાક અરેસ્ટ.

નવસારી બાદ હવે રાજકોટનો આ કિસ્સો જુઓઃ શહેરની સિવિલ હૉસ્પિટલમાં અક્ષયભાઈ નળિયાપરા પાર્કિંગ વિભાગમાં સિક્યોરિટી સંભાળે છે. ૧૭ જુલાઈની સવારે ૧૧ વાગ્યાની આસપાસ એમનો મોબાઈલ રણક્યો. ફોન એમના પુત્ર મુદિતની સ્કૂલમાંથી હતોઃ મુદિતની તબિયત બગડી છે, સિવિલ હૉસ્પિટલમાં લઈ ગયા છે. અક્ષયભાઈ ત્યાં પહોંચ્યા ત્યારે ઍમ્બ્યુલન્સમાંથી મુદિતને બેભાનાવસ્થામાં બહાર લાવવામાં આવી રહ્યો હતો. કમનસીબે ઍડ્મિટ કરતાંવેંત ૧૪ વર્ષના મુદિતને તબીબે મૃત જાહેર કર્યો. કારણ?: કાર્ડિયાક અરેસ્ટ.

આ ઘટનાના આઠ દિવસ પછી પણ મુદિતનો પરિવાર એને આ ઉંમરે હાર્ટ અટેક આવે એ માનવા તૈયાર નથી.

રાજકોટમાં જ જુલાઈ મહિનાના ૧૫ દિવસના ગાળામાં બે કિશોરનાં હાર્ટ અટેકથી મૃત્યુ થયાં. મુદિતનો જીવનદીપ બુઝાયો એના થોડા જ દિવસ પહેલાં (૩ જુલાઈએ) ગોંડલ પાસે આવેલા રિબડાની બોર્ડિંગ સ્કૂલમાં ૧૦મા ધોરણમાં ભણતો દેવાંશ ભાયાણી ગુરુપૂર્ણિમા નિમિત્તે સાંસ્કૃતિક કાર્યક્રમની તૈયારીના ભાગ રૂપે સહપાઠીઓની મદદથી સ્ટેજ પર પોડિયમ ગોઠવી રહ્યો હતો ત્યારે સ્ટેજ પર ઢળી પડ્યો હતો. હૉસ્પિટલ લઈ જવાતાં એનું મૃત્યુ થયું.

નાનપણથી મોબાઈલ ફોનની આદત અને ફાસ્ટ ફૂડનું વળગણ.. પહેલી નજરે કદાચ કોઈ સંબંધ ન લાગે, પણ અંતે તો બાળકનાં દિલ અને દિમાગ પર આ બધું અસર કરે છે.