സാമ്പത്തിക ആസൂത്രണം; സാഹചര്യങ്ങൾ തിരിച്ചറിഞ്ഞു പ്ലാൻ ചെയ്യാം

വ്യക്തികളുടെ സാമ്പത്തിക തീരുമാനങ്ങളെ മാനസികഘടന എങ്ങനെ സ്വാധീനിക്കുന്നു എന്നു പഠിക്കുന്ന ബിഹേവിയറൽ ഇക്കണോമിക്സ് എന്ന ശാഖയുണ്ട്

- അമൽ എസ്.

കൃത്യമായി എല്ലാ വിഷയവും അതാതു ദിവസം സമയബന്ധിതമായി പഠിച്ചാൽ എളുപ്പത്തിൽ നല്ല മാർക്ക് നേടാമെന്നു എല്ലാവർക്കും അറിയാം. പക്ഷേ, ബഹുഭൂരിഭാഗവും അതു ചെയ്യുന്നില്ല. മറിച്ച് ഓരോ വർഷം, അല്ലെങ്കിൽ സെമസ്റ്റർ അവസാനിക്കുമ്പോഴും, അടുത്ത തവണ ആകട്ടെ, ഉഴപ്പൊക്കെ മാറ്റിവച്ച് കൃത്യമായി പഠിക്കാം എന്നു നിശ്ചയിക്കും. അതിനായി തയാറെടുപ്പ് തുടങ്ങുമെങ്കിലും പൂർത്തിയാക്കില്ല എന്നതാണ് യാഥാർഥ്യം. പിന്നെ തീരുമാനം നടപ്പാക്കൽ അടുത്ത വർഷത്തേക്കു മാറ്റിവയ്ക്കും. ഈ ശീലം തന്നെയാണ് പഠനം കഴിഞ്ഞു ജോലി നേടിയശേഷവും ഭൂരിപക്ഷം പേരും ഫിനാൻഷ്യൽ പ്ലാനിങ്ങിന്റെ കാര്യത്തിലും പിന്തുടരുന്നത്.

ഇങ്ങനെ വർഷങ്ങൾ കഴിയുകയും ഉത്തരവാദിത്തങ്ങൾ കൂടുകയും ചെയ്യുമ്പോഴാണ് സാമ്പത്തിക ഭാവിയെക്കുറിച്ച് ആശങ്കപ്പെടേണ്ട അവസ്ഥയുണ്ടാവുന്നത്. വീണ്ടുമൊരു പുതുവർഷത്തിലേക്കു കടക്കുന്ന സാഹചര്യത്തിൽ സാമ്പത്തിക തീരുമാനങ്ങളെ സ്വയം അപഗ്രഥിച്ച്, പോരായ്മകളെ തിരിച്ചറിഞ്ഞ്, സാമ്പത്തികനില എങ്ങനെ മെച്ചപ്പെടുത്താനാകും എന്ന് ഓരോരുത്തരും ചിന്തിക്കുന്ന സമയമാണിത്.

ശരിയാണ്, നാമെല്ലാം സ്വന്തം സാഹചര്യങ്ങൾ വിലയിരുത്തി സാമ്പത്തികവും അല്ലാത്തതുമായ ഒട്ടേറെ പുതിയ തീരുമാനങ്ങളെടുക്കും. പക്ഷേ, മുകളിൽ പറഞ്ഞതു പോലെ ഈ തീരുമാനങ്ങളിൽ ബഹുഭൂരിപക്ഷവും നടപ്പാക്കാൻ മിക്കവർക്കും കഴിയാറില്ല. ഇനി തുടങ്ങിവച്ചാൽ തന്നെ തുടരാൻ കഴിയാറുമില്ല.

എന്തുകൊണ്ടു നടപ്പാക്കാനാകുന്നില്ല?

വ്യക്തികളുടെ സാമ്പത്തിക തീരുമാനങ്ങളെ മാനസികഘടന എങ്ങനെ സ്വാധീനിക്കുന്നു എന്നു പഠിക്കുന്ന ബിഹേവിയറൽ ഇക്കണോമിക്സ് എന്ന ശാഖയുണ്ട്. അതിൽ നമ്മുടെ ഉള്ളിൽ തന്നെയുള്ള പോരായ്മകളെ, തെറ്റുകളെ തിരിച്ചറിയാതെ തീരുമാനങ്ങളെടുക്കുന്ന ഒരു അവസ്ഥയെക്കുറിച്ച് നെയ്വ് ബിഹേവിയർ പറയുന്നുണ്ട്. അത്തരം ചില ഉദാഹരണങ്ങൾ കാണുക. അതിലൂടെ കുറെക്കൂടി എളുപ്പത്തിൽ കാര്യം മനസ്സിലാക്കാം.

അടുത്ത മാസം മുതൽ നിക്ഷേപിച്ചുതുടങ്ങാം എന്ന് പ്ലാൻ ചെയ്യും. പക്ഷേ, എല്ലാ മാസവും അടുത്ത മാസമാവട്ടെ എന്നു കരുതുന്ന രീതി.

ഭാവിയിൽ കൂടുതൽ തുക ഒരുമിച്ചു നിക്ഷേപിക്കാമെന്നോ ചെലവുചുരുക്കി തുക കണ്ടെത്താമെന്നോ സ്വയം ഉറപ്പിക്കും. പക്ഷേ, നടക്കില്ല.

• ഒരു ഓഹരി ഇടിയുമെന്ന് അറിയാമെങ്കിലും ഭാവിയിൽ കയറുമെന്ന വിശ്വാസത്തിൽ വീണ്ടും നിക്ഷേപിക്കും. മികച്ച മറ്റ് അവസരങ്ങൾ ഉണ്ടെങ്കിലും മാറാതെ ഉറച്ചുനിൽക്കും.