സംവദ് 2082 നിക്ഷേപകർക്കു മുന്നിൽ തെളിയുന്നത് യാത്രയ്ക്കുള്ള ദീപാലങ്കാരങ്ങൾ

ഈ വർഷത്തെ ദീപാവലി മുതൽ അടുത്ത ദീപാവലിവരെ നീളുന്ന പാതയിലേക്കു പ്രവേശിക്കുകയാണ് ഇന്ത്യയിലെ ഓഹരി, മ്യൂച്വൽ ഫണ്ട് നിക്ഷേപകർ

- വസുദേവ ഭട്ടതിരി

ഈ വർഷത്തെ ദീപാവലി മുതൽ അടുത്ത ദീപാവലിവരെ നീളുന്ന പാതയിലേക്കു പ്രവേശിക്കുകയാണ് ഇന്ത്യയിലെ ഓഹരി, മ്യൂച്വൽ ഫണ്ട് നിക്ഷേപകർ. അവരുടെ മുന്നിൽ ഇപ്പോൾ തെളിയുന്നതു ശുഭയാത്രയ്ക്ക് സ്വാഗതമോതുന്ന ദീപാലങ്കാരങ്ങളാണെന്നു പറയാം.

വിപണിക്ക് അത്രകണ്ട് അനുകൂലമായ സാഹചര്യമാണ് സംവദ് 2082ൽ. അതേസമയം, അപ്രതീക്ഷിതമായ പ്രതികൂല സാഹചര്യങ്ങൾ നേരിടാനുള്ള കരുതൽ ആവശ്യമായ കാലയളവു കൂടിയാണിത്. ആഗോളത ലത്തിലും ദേശീയാടിസ്ഥാനത്തിലുമുള്ള സാഹചര്യങ്ങൾ വിപണിയെ സ്വാധീനിക്കാം. രണ്ടു തരത്തിലുള്ള സാഹചര്യങ്ങൾക്കും തുല്യ പ്രാധാന്യമുണ്ടെന്നതും ശ്രദ്ധേയം.

ആഭ്യന്തര സാഹചര്യങ്ങളിൽ ഏറ്റവും ആദ്യം വിപണിയെ സ്വാധീനിക്കുക ദീപാവലി തന്നെയാണ്. ദീപാവലിയോടനുബന്ധിച്ചു രാജ്യമാകെ പ്രകടമാകുന്ന പ്രസരിപ്പിന്റെ പ്രതിഫലനം വിപണിയിൽ പ്രകടമാകും. ദീപാവലി ദിനത്തിലെ മുഹൂർത്ത വ്യാപാരമാകട്ടെ, വിപണിക്കു സുപ്രധാനമാണ്. ഹൈന്ദവ സാമ്പത്തിക വർഷമായി കണക്കാക്കുന്ന സംവദ് 2082നു തുടക്കം കുറിക്കുന്നതുമായി ബന്ധപ്പെട്ടുള്ള മുഹൂർത്ത വ്യാപാരത്തിലെ നേട്ടം അടുത്ത ദീപാവലി വരെ ആവർത്തിക്കുമെന്നാണു വിശ്വാസം. കഴിഞ്ഞ 20 വർഷത്തിനിടയിലെ 15 നവവത്സര ദിനത്തിലും വില സൂചികകളിൽ ഉയർച്ചയാണു രേപ്പെടുത്തിയത്.

രണ്ടാം പാദഫലങ്ങൾ

കോർപറേറ്റ് മേഖലയിൽനിന്ന് ഏതാനും ദിവസത്തിനകം രണ്ടാം പാദഫലങ്ങൾ വന്നുതുടങ്ങും. അതിൽ മാത്രമല്ല, തുടർന്നുള്ള പാദങ്ങളിലെ ഫലങ്ങൾ സംബന്ധിച്ചും വളരെ ഉയർന്ന പ്രതീക്ഷകളാണ് വിപണിക്കുള്ളത്. കോർപറേറ്റ് മേഖലയിലെ ഈ ഉണർവ് നിക്ഷേപവിപണിയിൽ സ്വാഭാവികമായും വലിയ ചലനങ്ങൾക്കു പ്രചോദനമാകും.