പുതിയ തൊഴിലിന് 5 പദ്ധതികൾ നേട്ടം യുവാക്കൾക്കും സംരംഭകർക്കും

തൊഴിൽ എടുത്താലും തൊഴിൽ നൽകിയാലും സർക്കാർ പണം നൽകും. അഞ്ചു വർഷത്തിനകം നാലു കോടിയിലധികം യുവാക്കൾക്കു ഗുണകരമായ പദ്ധതികൾ നടപ്പാക്കുമെന്നാണ് സർക്കാരിന്റെ അവകാശവാദം.

- 

ഇത്തവണ ബജറ്റ് അവതരിപ്പിച്ചു തുടങ്ങുമ്പോൾ ധനമന്ത്രി നിർമല സീതാരാമൻ എടുത്തുപറഞ്ഞ നാലു മേഖലകൾ തൊഴിൽ, നൈപുണ്യ വികസനം, എംഎസ്എംഇ, ഇടത്തരക്കാർ എന്നിവയാണ്. ഇവയെ അടിസ്ഥാനമാക്കി 2 ലക്ഷം കോടി രൂപ ചെലവിൽ അഞ്ചുവർഷംകൊണ്ട് 4.1 കോടി യുവാക്കൾക്കു ഗുണകരമായ പദ്ധതികൾ നടപ്പാക്കുമെന്നാണ് വാഗ്ദാനം. ഈ വർഷം മാത്രം തൊഴിൽ, നൈപുണ്യവികസനം, വിദ്യാഭ്യാസം എന്നിവയ്ക്കായി 1.48 കോടി രൂപ ചെലവഴിക്കും.

പ്രധാനമന്ത്രിയുടെ 5 പദ്ധതികൾ

തൊഴിൽ മേഖലയെ ശക്തിപ്പെടുത്താൻ നേരിട്ടു പണം നൽകുന്നത് ഉൾപ്പെടെ 5 സ്കീമുകളാണുള്ളത്.

പുതിയതായി ജോലിക്കാരെ നിയമിക്കുന്ന സ്ഥാപനങ്ങൾ വഴി പണം നൽകുന്നവയാണ് ആദ്യ 3 പദ്ധതികളും.

1. ആദ്യമായി ജോലിക്കു കേറിയാൽ 15,000 രൂപ

സംഘടിത മേഖലയിൽ പുതുതായി ജോലിയിൽ പ്രവേശിക്കുന്നവർക്ക് ഒരു മാസത്തെ ശമ്പളം, (പരമാവധി 15,000 രൂപ) സബ്സിഡിയായി നേരിട്ട് അക്കൗണ്ടിൽ നൽകും. ഇപിഎഫ്ഒയിൽ റജിസ്റ്റർ ചെയ്ത ഒരു ലക്ഷം രൂപവരെ ശമ്പളമുള്ളവർക്ക് മൂന്നു തവണകളായാണ് ഈ തുക നൽകുക. പദ്ധതിയിൽ രണ്ടാം ഗഡു സബ്സിഡി ലഭിക്കണമെങ്കിൽ ഓൺലൈനായി നിർബന്ധിത സാമ്പത്തിക സാക്ഷരതാ കോഴ്സിന്റെ ഭാഗമാകണം എന്നതാണ് നിബന്ധന. ഇതുവഴി പുതുതായി ജോലി നേടുന്ന യുവാക്കൾക്ക് നല്ല രീതിയിൽ പണം കൈകാര്യം ചെയ്യാനും ഭാവി ഭദ്രമാക്കാനും കഴിയുമെന്നുകൂടി പ്രതീക്ഷിക്കാം. 12 മാസത്തിനുള്ളിൽ ജോലി നഷ്ടപ്പെട്ടാൽ തുക തൊഴിലുടമയിൽ നിന്നും തിരിച്ചുപിടിക്കും. 23,000 കോടി രൂപയാണ് രണ്ടു വർഷ പദ്ധതിക്കായി കേന്ദ്രം ചെലവഴിക്കുന്നത്. ഔപചാരിക തൊഴിൽ മേഖലയിലേക്കു ഗ്രാമീണ യുവാക്കളെ ആകർഷിക്കാനും പദ്ധതി സഹായകരമാവും. അതേ സമയം പുതിയ തൊഴിലുകൾ ഇതുവഴി എങ്ങനെ സൃഷ്ടിക്കും എന്ന ചോദ്യത്തിന് വ്യക്തമായ ഉത്തരമില്ല.

2. തൊഴിലാളിക്കും തൊഴിലുടമയ്ക്കും പണം