അക്കൗണ്ടിൽ പണമില്ലെങ്കിലും ഇടപാടുകൾ നടത്താം

മുൻകൂട്ടി അനുവദിച്ചിട്ടുള്ള ക്രെഡിറ്റ് ലൈനിലൂടെ പണമിടപാട് നടത്താനുള്ള അവസരമാണ് യുപിഐ ഒരുക്കുന്നത്.

- 

സ്വന്തം അക്കൗണ്ടിൽ പണം ഇല്ലെങ്കിൽ പോലും, മുൻകൂട്ടി അനുവദിക്കപ്പെട്ട ഒരു ക്രെഡിറ്റ് ലൈൻ ഉപയോഗിച്ച് പണമിടപാടുകൾ നടത്താനുള്ള സംവിധാനത്തിന് ആർബിഐ തുടക്കം കുറിച്ചിരിക്കുകയാണ്.

ഇതിനെക്കുറിച്ചു കൂടുതൽ അറിയും മുൻപ് യുപിഐ എന്താണെന്നും അതുവഴി എങ്ങനെയാണ് ഇടപാടു നടക്കുന്നതെന്നും അറിയണം.

എളുപ്പം, ചെലവില്ല

 മൊബൈൽ ഫോൺ ഉപയോഗിച്ച്, ഏതു സമയത്തും വളരെ എളുപ്പത്തിലും ചെലവുകളില്ലാതെയും അങ്ങേയറ്റം സുരക്ഷിതമായും പണം ഒരു അക്കൗണ്ടിൽനിന്നു മറ്റൊരു അക്കൗണ്ടിലേക്കു കൈമാറാനുതകുന്ന സംവിധാനമാണ് യുപിഐ. അതിന് സ്വന്തം ഫോണിൽ യുപിഐ പേയ്മെന്റ് ആപ്ലിക്കേഷൻ ഡൗൺലോഡ് ചെയ്തു യുപിഐ അക്കൗണ്ട് ഉണ്ടാക്കുക എന്നതാണ് ആദ്യ പടി. എൻപിസിഐയുടെ സ്വന്തം യുപിഐ ആപ്പായ ഭീമിനു പുറമേ പേടിഎം, ഗൂഗിൾ പേ, ഫോൺ പേ, മൊബിക്വിക്, ആമസോൺ പേ, എന്നിവയ്ക്ക് പുറമേ നിങ്ങളുടെ ബാങ്കിന്റെ ആപ് അടക്കം ഏതു വേണമെങ്കിലും ഇതിനായി ഡൗൺലോഡ് ചെയ്യാം.

ഇത്തരം ആപ്പുകൾ പ്ലേ സ്റ്റോറിൽ നിന്നോ ആപ് സ്റ്റോറിൽ നിന്നോ തന്നെ ഡൗൺലോഡ് ചെയ്യാൻ പ്രത്യേകം ശ്രദ്ധിക്കണം. ആപ് ഡൗൺലോഡ് ചെയ്താൽ അടുത്ത പടി അക്കൗണ്ട് തുടങ്ങുക എന്നതാണ്. അതിന് ആദ്യം നൽകേണ്ടത് മൊബൈൽ നമ്പർ ആണ്. ബാങ്കിൽ നൽകിയിരിക്കുന്ന അതേ മൊബൈൽ നമ്പർ തന്നെയാണ് ഇവിടെയും നൽകേണ്ടത്. ഈ മൊബൈൽ നമ്പർ നൽകിയാൽ ഒടിപി ഫോണിൽ എത്തും. ഈ ഒടിപി വെരിഫൈ ചെയ്തശേഷം ഒരു പിൻ നമ്പർ (Personal Identification Number) നൽകിയാൽ ആപ്ലിക്കേഷൻ ഓപ്പൺ ആകും.

ബാങ്ക് അക്കൗണ്ട് ലിങ്കിങ്