പഠിക്കാൻ മുടക്കുന്നതും നിക്ഷേപം തന്നെ

പഠനം സ്വദേശത്തും തൊഴിൽ വിദേശത്തുമായാൽ ഉന്നത വിദ്യാഭ്യാസത്തിനായി മുടക്കുന്ന പണത്തിന് ആദായം ഉറപ്പാക്കാം, സമ്പത്തു വളർത്താം.

- സി.എസ്. രഞ്ജിത്ത് പ്രമുഖ കോളമിസ്റ്റും വേൾഡ് ബാങ്ക് കൺസൽറ്റന്റുമാണ് ലേഖകൻ.

എത്ര വരുമാനം ലഭിക്കും?

മറ്റേതൊരു നിക്ഷേപവും പോലെ തിരികെ ലഭിക്കാവുന്ന വരുമാനനിരക്ക് കണക്കുകൂട്ടി താരതമ്യം ചെയ്തു വേണം ഇന്നത്തെ കാലത്ത് കോഴ്സുകളും കോളജുകളും തിരഞ്ഞെടുക്കാൻ. വായ്പയായാലും സ്വന്തം സമ്പാദ്യമായാലും പഠിക്കാൻ പണം മുടക്കും മുൻപു പഠിച്ചു കഴിഞ്ഞാൽ എത്ര വരുമാനം ലഭിക്കും എന്നൊരു വിശകലനം ആവശ്യമാണ്.

ഇന്റേണൽ റേറ്റ് ഓഫ് റിട്ടേൺ

പഠനാവശ്യങ്ങൾക്ക് കോഴ്സ് തീരുംവരെ ഒന്നിലേറെ വർഷങ്ങളിൽ പണം മുടക്കേണ്ടി വരുന്നു. ഈ സാഹചര്യത്തിൽ പലപ്പോഴായി പണം മുടക്കുകയും വരവ് ലഭിക്കുകയും ചെയ്യുമ്പോൾ ഒരൊറ്റ ശതമാന നിരക്കിൽ മൂലധന വളർച്ച മനസ്സിലാക്കാനുള്ള സൂചികയാണ് ഇന്റേണൽ റേറ്റ് ഓഫ് റിട്ടേൺ അഥവാ ഐആർആർ.

ജീവിതകാലം മുഴുവനും നിലനിൽക്കുന്നതാണ് വരുമാനമെങ്കിലും, ജോലി കിട്ടി വായ്പ തിരിച്ചടവ് കാലാവധി തീരും വരെ (15-20 വർഷം നീളുന്ന ചെലവും വരവും ഉൾപ്പെടുത്തി ഒരു കാഷ് ഫ്ലോ തയാറാക്കി അതിന്റെ ഐആർആർ കണ്ടുപിടിക്കുകയാണു വേണ്ടത്. പഠനത്തിനായി മുടക്കിയ പണത്തിൽ നിന്ന് എത്ര ശതമാനം വാർഷിക നിരക്കിൽ തിരികെ ലഭിക്കുന്നു എന്നാണ് ഐആർ ആർ ചൂണ്ടിക്കാട്ടുക. എക്സൽ സ്‌പ്രെഡ്ഷീറ്റ് സോഫ്റ്റ് വെയറിൽ ഐആർആർ ഫിനാൻഷ്യൽ ഫങ്ഷൻ എളുപ്പത്തിൽ ഉപയോഗിക്കാം.

വരവു ചെലവു പട്ടിക

വാർഷിക വരുമാനത്തിൽ താമസം, വസ്ത്രം, ഭക്ഷണം, ഉല്ലാസച്ചെലവുകൾ തുടങ്ങി ഒഴിവാക്കാനാകാത്ത ചെലവുകൾ ആദ്യമേ കുറയ്ക്കണം. തിരിച്ചടയ്ക്കേണ്ട മുതൽ തുകയും പലിശയും നികുതിത്തുകകളും കൂടി കുറവു ചെയ്ത് കാഷ് ഫ്ലോയിൽ വരുമാനമായി ഉൾപ്പെടുത്താം. ചെലവായ തുക കണക്കുകൂട്ടുമ്പോൾ പലിശച്ചെലവു കൂടി ഉൾപ്പെടുത്തി വേണം കാഷ് ഫ്ലോ തയാറാക്കാൻ.