പനിക്കൂർക്ക വിഭവങ്ങൾ

രൂപഭാവത്തിൽ കൂർക്കയോട് സാദൃശ്യമുണ്ടെങ്കിലും ആഹാരാവശ്വത്തിനും ഔഷധാവശ്യത്തിനും പനിക്കൂർക്കയുടെ ഇലകളാണ് ഉപയോഗിച്ചുവരുന്നത്

- ഡോ.കെ.എസ്.രജിതൻ സീനിയർകൺസൾട്ടന്റ് ഔഷധി പഞ്ചകർമആശുപത്രി, തൃശ്ശൂർ [e-mail]

കുട്ടികൾക്കും മുതിർന്നവർക്കും വളരെയധികം ഉപയോഗപ്രദമായ സസ്യമാണ് പനിക്കൂർക്ക. രൂപഭാവത്തിൽ കൂർക്കയോട് സാദൃശ്യമുണ്ട്. എന്നാൽ ആഹാരാവശ്യത്തിനും ഔഷധാവശ്യത്തിനും പനിക്കൂർക്കയുടെ ഇലകളാണ് ഉപയോഗിച്ചുവരുന്നത്. കോളിയസ് അരോമാറ്റിക്ക് Coleus aromaticus) എന്ന താണ് പനിക്കൂർക്കയുടെ ശാസ്ത്രനാമം. ലാമിനേസിയെ (Lamiaceae)സസ്യകുടുംബത്തിലാണ് ഇത് ഉൾപ്പെടുന്നത്. പനിക്കൂർക്ക കൊണ്ട് ഉണ്ടാക്കാവുന്ന ചില ആഹാരങ്ങൾ ഇവയാണ്.

പനിക്കൂർക്ക സൂപ്പ്

ചേരുവകൾ: പനിക്കൂർക്ക ഇല 15 എണ്ണം, കാരറ്റ് ചെറുതായി അരിഞ്ഞത് 50ഗ്രാം, സവാള ചെറുതായി അരിഞ്ഞത് 25 ഗ്രാം, തക്കാളി അരിഞ്ഞത് 25 ഗ്രാം, വെള്ളം ഒന്നേകാൽ ലിറ്റർ.

തയ്യാറാക്കുന്ന വിധം:

ഒരു പാത്രത്തിൽ വെള്ളം തിളപ്പിക്കുക. ഇതിലേക്ക് ചേരുവകളെല്ലാം ചേർക്കണം. തിളച്ച് വറ്റിച്ച് സൂപ്പിന്റെ പാകമാകുമ്പോൾ ഇറക്കിവയ്ക്കുക. ശേഷം, ആവശ്യത്തിനനുസരിച്ച് കുരുമുളക് പൊടിയും ഉപ്പും ചേർത്ത് കുടിക്കാം.

പനിക്കൂർക്ക രസം

ചേരുവകൾ: പനിക്കൂർക്ക ഇലകൾ 10 എണ്ണം, ചതച്ചെടുത്ത കുരുമുളക് ഒരു ടേബിൾ സ്പൂൺ, തുവരപ്പരിപ്പ് ഒരു ടേബിൾ സ്പൂൺ (കുരുമുളകും തുവരപ്പരിപ്പും നെയ്യിൽ വറുത്തെടുത്ത് പൊടിയാക്കുക) വെള്ളം ഒരു ലിറ്റർ, വെളുത്തുള്ളി ആറ് അല്ലി ചതച്ചത്, ഉപ്പ്, ചെറുനാരങ്ങ നീര് ആവശ്യത്തിനനുസരിച്ച്, ജീരകപ്പൊടി, ഉലുവപ്പൊടി, കടുകുപൊടി (നെയ്യിൽ വറുത്ത് പൊടിയാക്കിയത്), പനിക്കൂർക്ക ഇല 10 എണ്ണം, മല്ലി ഇല, കറിവേപ്പില ആവശ്യത്തിനനുസരിച്ച്).