തനതുവഴിയിൽ കൃഷി ലാഭമാക്കി യുവാക്കൾ

പരമ്പരാഗത കൃഷിയിനങ്ങളെ പുതുശൈലികളിലൂടെ മികച്ച ലാഭത്തിലെത്തിക്കുന്ന ചെറുപ്പക്കാർ

- ജോബി ജോസഫ് തോട്ടുങ്കൽ

കൃഷി നഷ്ടമാണ് എന്ന പൊതുബോധം ശക്തമായി വേരൂന്നിയിട്ടുണ്ട് കേരളത്തിൽ. 10-12 വർഷത്തിനിടയിലാണ് ഈ പ്രചാരണം ഉച്ചസ്ഥായിലെത്തിയത്. "കൃഷിക്കാർ' എന്നു സ്വയം വിശേഷിപ്പിച്ച് സമൂഹ മാധ്യമങ്ങളിൽ കത്തിക്കയറുന്ന പലരും കാർഷിക വരുമാനം ആശ്രയമാക്കിയവരല്ല. ജീവിക്കാൻ കൃഷിയെ ആശ്രയിക്കേണ്ടതില്ലാത്ത ഈ കൃഷിക്കാരും മൂന്നും പിന്നും നോക്കാതെ കൃഷിയിൽ മുതലിറക്കി പരാജയപ്പെട്ടവരുമാണ് നമ്മുടെ കാർഷിക മേഖലയിൽ പൊതുബോധം രൂപപ്പെടുത്തുകയും നിയന്ത്രിക്കുകയും ചെയ്യുന്നതെന്നതു നിർഭാഗ്യകരമാണ്. സമൂഹ മാധ്യമങ്ങളിൽ കൃഷിയനുഭവങ്ങൾ എഴുതാനും പറയാനും ഇവർ മുന്നിലുണ്ട്. തങ്ങളുടെ വീഴ്ചകളും പരാജയകാരണവും വിലയിരുത്താതെ കൃഷി നഷ്ടമാണെന്നു പ്രചരിപ്പിക്കുന്ന ഇവർ സംസ്ഥാനത്തിന്റെ കൃഷിസാധ്യതകളെ മുഴുവൻ അറിഞ്ഞോ അറിയാതെയോ റദ്ദു ചെയ്യുകയാണ്.

എല്ലാവരും കൃഷി ചെയ്യണോ

എല്ലാവർക്കും എല്ലാ തൊഴിലും വഴങ്ങില്ലെന്നതു യാഥാർഥ്യമാണ്. പുതിയ കാലത്ത് കൃഷി സർവർക്കും വിജയിക്കാവുന്ന തൊഴിലല്ല. ശാസ്ത്രീയ കൃഷിരീതികളും യന്ത്രവൽക്കരണവും നൂതന സാങ്കേതികവിദ്യകളും എല്ലാറ്റിലുമുപരി, യോജ്യമായ വിപണനതന്ത്രങ്ങളും പഠിച്ചു പ്രയോഗിക്കാൻ പ്രാപ്തിയുള്ളവർക്കു മാത്രമേ ഇനിയങ്ങോട്ടു കൃഷിയിൽ നേട്ടമുണ്ടാക്കാനാവൂ. കൃഷിയിലേക്കു വരേണ്ടതും അവർ തന്നെ.