ശാസ്ത്രീയമായാൽ ബിവി 380 നേട്ടം

കൃത്യമായ ആസൂത്രണമില്ലെങ്കിൽ മുട്ടക്കോഴി വളർത്തൽ ലാഭകരമാവില്ല

- ഐബി

കേരളത്തിൽ വ്യാവസായിക കോഴിമുട്ടയുൽപാദനം സാധ്യമാക്കിയത് ബിവി 380 എന്ന ഇനമാണ്. വർഷം 300 മുട്ടകൾ വരെ ഉൽപാദിപ്പിക്കാനുള്ള ജനിതകശേഷിയുള്ള ഈ ഇനത്തിനു സാന്ദ്രിതതീറ്റ നൽകണമെന്നു മാത്രം. മുട്ട കോഴികൾക്കുള്ള കമ്പനിത്തീറ്റ നൽകിയാൽ മാത്രമേ ബിവി 380 അതിന്റെ ജനികതശേഷി പൂർണമായി വിനിയോഗിക്കുകയുള്ളൂ. അതുകൊണ്ടുതന്നെ മുട്ടക്കോഴിവളർത്തൽ ലാഭകരമല്ലെന്നു പറയുന്നവരേറെ. എന്നാൽ, സ്വന്തമായി വിപണി കണ്ടെത്തി, മികച്ച രീതിയിൽ മുട്ട വിൽക്കുന്ന കർഷകരും ഇവിടെയുണ്ട്.

കൃഷി വ്യാവസായികാടിസ്ഥാനത്തിൽ നടത്തിയാലേ ലാഭകരമാകു എന്നു പറയുന്നു, പത്തനംതിട്ട വടശ്ശേരിക്കര പുതുപ്പറമ്പിൽ പ്രവീൺ. വൻതോതിൽ ഉൽപാദിപ്പിച്ച് അതിനു കൃത്യമായ വിപണിയും കണ്ടെത്തിയാൽ ലാഭം ഉറപ്പാണെന്നും നൂറും ഇരുനൂറും കോഴികളെ വളർത്തി ലാഭം നേടാൻ കഴിയില്ലെന്നും പ്രവീൺ. വടശ്ശേരിക്കരയിലെ 5 ഏക്കർ സ്ഥലത്ത് പച്ചക്കറിക്കൃഷിയുണ്ടു പ്രവീണിന്. 8 മാസത്തിലേറെയായി മുട്ടക്കോഴി വളർത്തലും. രണ്ടു ബാച്ചുകളിലായി 1200 മുട്ടക്കോഴികളെ വളർത്തുന്നു. 634 എണ്ണം മുട്ടയിടുന്നവയാണ്. ശേഷിക്കുന്നവ ഏപ്രിൽ അവസാനത്തോടെ മുട്ടയിട്ടു തുടങ്ങും.