ബംപർ അടിച്ചു കൃഷിയിലും

ലോട്ടറി സമ്മാനത്തുക കൃഷിയിൽ മുടക്കിയ രവീന്ദ്രൻ നായരുടെ വാർഷിക വരുമാനം അതിന്റെ അഞ്ചിരട്ടി

- ജയിംസ് ജേക്കബ്

ലോട്ടറിയുടെ ബംപർ സമ്മാനം നേടിയാൽ നിങ്ങൾ എന്തു ചെയ്യും? സമ്മാനത്തുക എവിടെ നിക്ഷേപിക്കും? ഓഹരി, മ്യൂച്വൽ ഫണ്ട്. ബാങ്ക് നിക്ഷേപം, റിയൽ എസ്റ്റേറ്റ്..... മറുപടികൾ പലതുണ്ടാവും. പക്ഷേ, മുഴുവൻ തുകയ്ക്കും ഭൂമി വാങ്ങി വിപുലമായി കൃഷി ചെയ്യുമെന്നു പറയാൻ ആരുണ്ടാവും?. ആരുമുണ്ടാവില്ലെന്നു പറയാൻ വരട്ടെ. അങ്ങനെയൊരാളുണ്ട്, വണ്ടൻ മേട് പുറ്റടി രാജാക്കണ്ടം ചെമ്പകശേരി വീട്ടിൽ സി.ഡി.രവീന്ദ്രൻ നായർ.

കേരള ലോട്ടറി ക്രിസ്മസ് ബംപറിന്റെ ഒന്നാം സമ്മാനമായി 1993ൽ കിട്ടിയ 24 ലക്ഷം രൂപയും മുടക്കി കൃഷിഭൂമി വാങ്ങിയ രവീന്ദ്രൻ നായർ അന്നത്തെ സമ്മാനത്തുകയുടെ അഞ്ചിരട്ടിയിലേറെയാണ് ഇന്നു വാർഷിക വരുമാനം നേടുന്നത്. ഏലത്തിനു വില കുത്തനെ ഉയർന്നതിനാൽ ഇക്കൊല്ലം നേടിയത് മെഗാ ബംപർ. ഏലം പിന്നോട്ടടിച്ചാൽത്തന്നെ നെല്ലും പച്ചക്കറിയും വളർത്തുമൃഗങ്ങളുമുണ്ട് രവീന്ദ്രൻ നായർക്ക് തുണ നിൽക്കാൻ. എംബിഎക്കാരനായ മകൻ പ്രണവ് ബെംഗളൂരുവിലെ ജോലി രാജിവച്ച് അച്ഛനോടൊപ്പം കൃഷിയിൽ പങ്കാളിയായതു കൃഷിയിലുള്ള വിശ്വാസം കൊണ്ടുതന്നെ. മാന്യമായ വരുമാനം ഉറപ്പങ്കിൽ യുവാക്കൾ നാടു വിടില്ലെന്നതിനു മറ്റൊരു തെളിവു കൂടി.

രാജാക്കണ്ടം പോസ്റ്റ് ഓഫിസിലെ പോസ്റ്റ്മാൻ ജോലിക്കൊപ്പം ഒന്നോ രണ്ടോ ഏക്കറിൽ കൃഷി ചെയ്തു വരവേയാണ് രവീന്ദ്രൻ നായർക്കു ലോട്ടറി അടിച്ചത്. പണത്തെക്കാൾ കൃഷിയെ സ്നേഹിച്ച അദ്ദേഹം കൂടുതൽ സ്ഥലം വാങ്ങി കൃഷി വിപുലമാക്കാനാണു തീരുമാനിച്ചത്. അങ്ങനെയാണ് പുറ്റടിയിൽത്തന്നെ 13 ഏക്കർ ഏലത്തോട്ടം വാങ്ങിയത്. സ്ഥലം വാങ്ങിയിട്ടശേഷം മുതലാളി ചമഞ്ഞ് കസേരയിലിരിക്കുകയല്ല രവീന്ദ്രൻ ചെയ്തത്. ഒരു ഇഞ്ച് സ്ഥലത്തു പോലും കൃഷിയിറക്കി, നന്നായി അധ്വാനിച്ചു. പുറ്റടിയിലെ കാലാവസ്ഥയുമായി പൊരുത്തപ്പെടുന്ന ഏറക്കുറെ എല്ലാ വിളകളും ഇവിടെയുണ്ട്.

ഏലത്തിന് ഏറ്റവും യോജിച്ച ഈ കൃഷിയിടത്തിൽ അതു തന്നെ മുഖ്യവിള. ദിവസേന മുന്നൂറോളം ലീറ്റർ പാലുൽപാദനമുള്ള തൊഴുത്തും കോഴി, ആട് വളർത്തലും അഞ്ചരയേക്കർ നെൽകൃഷിയുമൊക്കെയായി ഒരു മാതൃകാ സമ്മിശ്രത്തോട്ടം. രവീന്ദ്രൻ നായരുടെ വരുമാന വഴികൾ ഓരോന്നായി പരിചയപ്പെടാം.

ഏലം