വെള്ളത്തിലാവില്ല വെളളത്തിൽകൃഷി

ഹൈഡ്രോപോണിക്സ് കൃഷിക്കാരെ കൂട്ടിയിണക്കാൻ സ്റ്റാർട്ടപ് സംരംഭം

- 

മണ്ണ് പൂർണമായും ഒഴിവാക്കി വെള്ളത്തിൽ വിളവെടുക്കുന്ന ഹൈഡ്രോപോണിക്സ് കൃഷിരീതി നമ്മുടെ കർഷകർക്കിന്ന് അത്ര അപരിചിതമല്ല. എങ്കിലും സംസ്ഥാനത്തു വാണിജ്യാടിസ്ഥാനത്തിൽ കൃഷി നടക്കുന്ന ഹൈഡ്രോപോണിക്സ് ഫാമുകൾ ഇന്നും അപൂർവം. നേരെ മറിച്ചാണ് മറ്റു പല സംസ്ഥാനങ്ങളിലെയും സ്ഥി തിയെന്നു പറയുന്നു തിരുവനന്തപുരം കരമനയിലെ അപ് ടൗൺ അർബൻ ഫാംസ് എന്ന ഹൈഡ്രോപോണിക്സ് സംരംഭത്തിന്റെ സ്ഥാപകൻ തൻവീർ അഹമ്മദ്. കൊച്ചിൻ യൂണിവേഴ്സിറ്റി ഫോർ സയൻസ് ആൻഡ് ടെക്നോളജി യിൽനിന്നു മറൈൻ എൻജിനീയറിങ്ങിൽ ബിടെക് നേടിയ തൻവീർ സ്വന്തം സംരംഭം എന്ന ലക്ഷ്യത്തോടെയാണ് സ്മാർട് ഫാമിങ്ങിലെത്തിയത്.

ലോകം മുഴുവൻ ഇന്നു സ്മാർട് ഫാമിങ്ങിലേക്കു തിരിയുകയാണെന്നു തൻവീർ. സ്ഥലദൗർലഭ്യം മുതൽ  കാലാവസ്ഥാവ്യതിയാനം വരെ കാരണങ്ങൾ. കീടനാശിനികൾ പ്രയോഗിക്കാതെയും വെള്ളം പരമാവധി ലാഭിച്ചു. കായികാധ്വാനം കുറച്ചും എങ്ങനെ കുറഞ്ഞ സ്ഥലത്തു നിന്നു കൂടുതൽ ഉൽപാദനം നേടാം എന്നതാണു ചിന്ത.