கடல்வாழ் உயிரினங்கள்... தாவரங்களை கண்ணாடிப் படகில் சென்று ரசிக்கலாம்!

ஓங்கி வளர்ந்து நிற்கும் தென்னை, சவுக்கு மரங்கள் நிறைந்த, அழகிய வெண் மணல் பரப்புடன் கூடிய கடற்கரை.

- கருமுத்து. சுப்ரமணியசிதம்பரம்

கடல் அலைகளின் ஆரவாரமற்ற, அமைதியான கடலுக்கு அடியில் அரியவகை பவளப் பாறைகள். கடல்பாசிகள், நீந்திச் செல்லும் வண்ண வண்ண மீன்கள், நடுவே வெண் மணல் திட்டு...

இப்படி இன்னிசை பாடும் காற்றுடன் கூடிய கண்ணாடிப் படகில் சென்று பார்க்கும் மனதை மயக்கும் சொர்க்கமாக விளங்குகிறது ஏர்வாடி பிச்சைமூப்பன் வலசை மணல் திட்டு. இது ஒரு சூழல் சுற்றுலா திமிங்கிலம், டால்பின், கடற்பசு, கடல் ஆமைகள், கடல் குதிரை போன்ற அரிய வகை மீன்கள், கடல் தாவரங்கள், கடல் பாசி, சங்கு, சிப்பி, முத்து என உலகத்திலேயே வேறு எங்கும் இல்லாதவகையில் ஆயிரக்கணக்கான அரிய வகை கடல்வாழ் உயிரினங்களுடன், அழகியலும், அரிய வகை பவளப்பாறைகளும் என இயற்கை வழியாக அமைந்துள்ளது மன்னார் வளைகுடா கடல் பகுதி.

வறண்ட மாவட்டத்தில் வனப்புமிகு சுற்றுலாத்தலம்

சுற்றுலாப்பயணிகள் கூறும்போது, "வறண்ட மாவட்டமாக கூறப்படும் நான்குபுறமும் சூழப்பட்ட கடல் என இயற்கை எழில் கொஞ்சும் இந்த அழகிய கடற்கரை குடும்பத்தாருடன் வந்து மகிழ சிறந்த இடமாக உள்ளது.

கண்ணுக்கும், மனதிற்கும் ஆரோக்கியமான ஒரு புதுவிதமான அனுபவத்தை தருகிறது இந்த பவளப்பாறை படகுச் சவாரி.

பவளப்பாறை கண்காட்சி முடிந்தவுடன் படகு அடுத்து நிற்கும் இடம் அழகிய வெண் மணற்பரப்பு கொண்ட மணல் திட்டு கடற்கரை பகுதியாகும்.

இப்பகுதி சற்று ஆசுவாசப்படுத்தப்படும் இடமாக உள்ளது.

இங்கு இறங்கி, நான்கு புறம் சூழ்ந்துள்ள அழகிய கடல் மட்டுமின்றி அருகில் பசுமையாக காட்சியளிக்கும் வாலிமுனை தீவு, ஆணைப்பார் தீவு மற்றும் இரை தேடி வட்டமிடும் வெளிநாட்டுப் பறவைகள், கடலோர பாதுகாப்புப் படையினரின் ரோந்து ஹெலிகாப்டர் ஆகியவற்றையும் பார்த்து ரசிக்கக் கூடியதாக உள்ளது.

அதன்பிறகு குடும்பத்தார், நண்பர்களுடன் சூப்பரான செல்பியுடன், கரையை நோக்கி புறப்படுகிறது கண்ணாடிப் படகு.

கரைக்கு வந்தவுடன் அங்குள்ள செல்பி பாயிண்ட்டில் சுற்றுலா வந்ததற்கான நினைவாக ஒரு செல்பி. பிறகு வனத்துறை ஒப்புதலோடு அமைக்கப்பட்டுள்ள கேண்டீனில் விரும்பிய டீ, காபி, குளிர்பானம், ஸ்நாக்ஸ் வாங்கிச் சாப்பிடலாம்.