ஒன்றிய அரசின் அலட்சியத்தால் நரகமாகும் இந்திய நகரங்கள்!

'இந்திய நகரங்களின் வளர்ச்சி அசுரத்தனமாக இருக்கிறது.

- டி.ரஞ்சித்

கடந்த 20 ஆண்டுகளில் இந்தியாவில் சுமார் 100 ஹைதராபாத் / பெங்களூரையாவது உருவாக்கிவிட்டோம். ஆனால், இந்த நகரங்கள் எல்லாம் திட்டமிட்டு உருவாக்கப்பட்டவை அல்ல. மாறாக தான்தோன்றித்தனமாக உருவானது. இதனால் ஆயிரம் பிரச்னைகளை இந்திய நகரவாசிகள் விரைவில் உணர்வார்கள்...'

இப்படியொரு அபாய அறிவிப்பை வெளியிட்டிருக்கிறது பெங்களூரைச் சேர்ந்த ஒரு தன்னார்வ அமைப்பு.

'ஜனாகிரஹா' எனும் தன்னார்வ அமைப்பு பெங்களூரிலிருந்து செயற்படுகிறது. இதன் முதன்மையான பணி இந்திய நகரங்களின் தராதரத்தை அவ்வப்போது ஆய்வு செய்து வெளியிடுவது.

அண்மையில் இந்த அமைப்பு ஓர் அறிக்கையை சமர்ப்பித்தது. அதில் இந்திய நகரங்கள் பற்றி ஒரு முக்கியமான எச்சரிக்கையை அது கொடுத்திருக்கிறது.

அதுதான், 'இந்திய நகரங்களின் இன்றைய வளர்ச்சி என்பது பொருளாதார வளர்ச்சியால் அல்லது திட்டமிட்ட வடிவமைப்பால் உருவானதல்ல. மாறாக அது ஏனோதானோ என வளர்ந்த ஒரு வளர்ச்சி...' எனக் குற்றம்சாட்டுகிறது.

உதாரணமாக '2005ம் ஆண்டிலிருந்து 2023 வரை இந்தியாவின் மொத்த நிலப்பரப்பில் சுமார் 25 லட்சம் ஹெக்டேர் பரப்பளவு நகரமாக விரிவடைந்திருக்கிறது.

இன்றைய தினத்தில் 50 கோடி சொச்சம் பேர் நகரத்தில் வாழ்கிறார்கள். ஆனால், இது இன்னும் 20 வருடங்களில் 72 கோடியாக உயரும். அதுபோல இன்னும் சில வருடங்களில் வேலைவாய்ப்பு என்பது 70 விழுக்காடு நகரத்தில்தான் இருக்கும்...' எனச் சொல்லும் அந்த அறிக்கை இதனால் ஏற்படப்போகும் பிரச்னைகள் பற்றியும் விவரிக்கிறது.

'இந்தியாவின் நகரங்கள்தான் இந்தியாவின் மொத்த உற்பத்தியில் 60 விழுக்காடு பங்களிக்கிறது. என்றாலும் அதில் 28 விழுக்காடு மொத்தம் 10 பெரிய மாநகரங்களிலிருந்துதான் வருகின்றன.