தங்கலான்: தமிழ் சினிமாவின் கழுத்தில் இன்னொரு தங்க மாலையா?

'தங்கலான் கதையே புரியவில்லை. இது ஒரு கட்டுக்கதை. வரலாற்றுத் திரிப்பு. இது சாதியத்தை தூக்கிப்பிடிக்கிறது.

- இரா.பிரபாகர்

ஆகவே இந்தப்படத்தைப் புறக்கணிப்போம்' என்பதுபோன்ற எதிர்விமர்சனங்களைப் பொருட்படுத்தாமல் படம் பெரிய அளவில் பேசப்பட்டிருக்கிறது. ரஞ்சித் படங்களிலேயே அதிகமும் பாராட்டுகளையும் எதிர்ப்பையும் ஒரு சேரப் பெற்றிருக்கிறது. எப்படியிருப்பினும் படக்குழுவினர் வெற்றிவிழாவையும் கொண்டிடாடி முடித்துவிட்டனர்.

பொதுவாகத் திரைப்பட விமர்சனங்களை நம் சனங்கள் பெரிதாகக் கண்டுகொள்ளாமல் கடந்துபோவது வழக்கம். ஆனந்தவிகடனில் ஐம்பது மதிப்பெண்கள் போட்டுவிட்டார்கள் என்பதற்காகவோ, இந்த விமர்சகர் பாராட்டிவிட்டார் என்பதற்காகவோ அரங்குகளில் அலைமோதுவதில்லை. சமூக ஊடகங்களின் வருகையால் அவரவர் அதீத சார்புகளையும் வன்மங்களையும் கொட்டித் தீர்ப்பதைக் காணமுடிகிறது. அதிலும் தலித்திய அரசியல் பேசும் படங்கள் குறிப்பாக இயக்குநர் ரஞ்சித்தின் வருகைக்குப் பின் படங்களைப் விமர்சிப்பதும் பாராட்டுவதும் கூட அரசியலாகப் பார்க்கப்படுவதையும் காணமுடிகிறது.

தங்கலான் பற்றிய அபாண்டமான எதிர்விமர்சனங்களைப் பொருட்படுத்தத் தேவையில்லை என்றாலும் சில அடிப்படையான கேள்விகள் பார்வையாளர்களுக்கு எழுந்ததை எளிதாகப் புறக்கணித்துவிட முடியாது.